Ад сэрца да сэрца: падарылі хвіліны радасці
Напярэдадні Дня інвалідаў Рэспублікі Беларусь самадзейныя артысты Варанцэвіцкай сярэдняй школы і мясцовага Дома культуры завіталі з канцэртам у Рацаўскі псіханеўралагічны дыспансэр.
Трэба сказаць, што такія сустрэчы сталі традыцыйнымі, юныя і дарослыя артысты з Варанцэвічаў бывалі ў гасцях у Рацаве ўжо не раз. І цяпер, як заўсёды, іх зноў сустрэла зала, перапоўненая гледачамі.
Нягледзячы на цяжкі лёс людзей, якія вымушаны жыць у гэтай установе, яны заўсёды адкрытыя і добразычлівыя. Адпаведна і выканаўцы, хоць і адчувалі, апынуўшыся на сцэне, хваляванне, выконвалі свае нумары з асабліваю пяшчотаю і любоўю. За лічаныя імгненні ў памяшканні ўсталявалася і панавала да самага развітання атмасфера адзінства і дабрыні.
Аляксандр ЧУРЫЛАЎ,
педагог-арганізатар Варанцэвіцкай СШ.
