Як добры і мудры дарадца: у Коханаве прайшоў дзень падпісчыка
Коханаўскае аддзяленне паштовай сувязі сустрэла нас клопатамі і гаманой шматлікіх яго наведвальнікаў. І так, заўважылі людзі, амаль заўсёды. А ў гэтую раніцу тут была аб’яўлена яшчэ і сустрэча з прадстаўніком рэдакцыі раённай газеты і кіраўніком, і спецыялістам раённага вузла паштовай сувязі.
Нягледзячы на рабочую абстаноўку ў аддзяленні дыялог выдаўся карысным і каштоўным для ўсіх. Так і хочацца заўважыць: раёнка ўсё ж такі нас аб’ядноўвае. І звязуючым звяном пры гэтым, безумоўна, з’яўляецца друкаванае слова. Таму не спатрэбілася доўгіх уступаў.
Людзі гаварылі шчыра і ад душы, маючы заслужанае права, будучы яе пастаяннымі падпісчыкамі, на ацэнку і падзяку сваёй газеце, а таксама і на прапановы. І хоць жыхар гарпасёлка Мікалай Петрушэнка пачаў не з усхвалення цяперашняй рэдакцыйнай “кухні”, маўляў, пабойваюцца талачынскія журналісты крытыкі, не як было ў 40-я ці 50-я гады, калі прапісвалі ў газеце п’янства старшыні калгаса ці сельвыканкама і іншую кожную дробязь, прысутныя не пайшлі падзяляць чыёсьці меркаванне, выказалі свае адзнакі.
Дзякуем за добрыя словы і шчырыя пачуцці ў адрас газеты і чытачу з вялікім стажам Лідзіі Васільеўне Цімашковай, якая зараз на заслужаным адпачынку, і маладой маці Таццяне Пашкевіч, і ўсім іншым удзельнікам сустрэчы, хто заўжды жыве чаканнем газеты, прызнаецца ў любові да яе, з захапленнем гартае яе старонкі, верыць у яе добрую будучыню.
Мы не баімся з кімсьці канкурыраваць. Дай бог ахапіць аператыўна ўсе падзеі, што маюць месца на Талачыншчыне, у тым ліку і ў асабістым жыцці людзей. Іх жыццё, здзяйсненні вартыя прафесіянальнага і адказнага слова. Вось таму і не драбнее гэтае творчае рэчышча, якое напаўняецца пастаянна б’ючымі струменямі Дабрыні, Бескарыслівасці, Сумлення, Працы.
Сустрэча з падпісчыкамі, або іх часткай, пераканала ў чарговы раз у тым, што павагу да раёнкі сваіх чытачоў трэба адпрацоўваць узнёслым, натхняльным словам.
Віктар БІРУКОЎ.
Як добры і мудры дарадца: у Коханаве прайшоў дзень падпісчыка,
Это они от уровня получаемой пенсии
Так возраст, вроде как, не совсем пенсионный у большинства на фото…
Какие-то совсем кислые лица у подписчиков…