Глыбокая плынь жыцця: у дзіцячай бібліятэцы ў Талачыне разгорнута выстава “Лепшыя кнігі Івана Шамякіна”
30 студзеня споўнілася 95 гадоў з дня нараджэння Івана Шамякіна — народнага пісьменніка, класіка нашай нацыянальнай літаратуры, грамадскага дзеяча. Яшчэ пры жыцці ён стаў адным з самых вядомых і папулярных пісьменнікаў у Беларусі і за яе межамі. Яго творы, вядомыя нам са школы, перакладзены больш чым на 30 моў свету, выдаваліся ў Савецкім Саюзе шматтысячнымі і мільённымі тыражамі.
Іван Шамякін належыў да пакалення пісьменнікаў, маладосць якіх была апалена і загартавана вайной. Большасць яго твораў так ці інакш звязана з падзеямі Вялікай Айчыннай вайны.
З гэтай нагоды у гарадской дзіцячай бібліятэцы ў чытальнай зале для вучняў старэйшых класаў аформлена кніжная выстава “Лепшыя кнігі Івана Шамякіна”. Работнікамі бібліятэкі быў праведзены агляд літаратуры пісьменніка. Увазе вучням прадстаўлены аповесці “Помста”, “Гандлярка і паэт”, “Ахвяры”, раманы “Глыбокая плынь”, “Снежныя зімы”, “Сэрца на далоні”, “Атланты і карыятыды”, “Вазьму твой боль”, “Злая зорка” і іншыя.
Аматары творчасці пісьменніка да 15 лютага могуць наведаць выставу, каб глыбей пазнаёміцца з творчасцю Івана Шамякіна, кожны твор якога — старонка жыцця беларускага народа, яго гісторыі.
Алена МАНЬКОЎСКАЯ,
загадчыца гарадской дзіцячай бібліятэкі.