Алена Роўба: у асваенні новай прафесіі дапамаглі веданне камп’ютарнай граматы і парады вопытных калег
Можна з упэўненасцю сказаць, што Алена Роўба стала дастойнай зменай былой загадчыцы паштовага аддзялення “Ламіншчына” Людмілы Пятроўны Васільевай, якая шмат гадоў свайго жыцця аддала гэтай працы і цяпер на заслужаным адпачынку.
Вырасла Алена ў Славенях, марыла стаць правадніцай. Пры паступленні ў чыгуначны каледж не набрала дастатковую колькасць балаў. Дзяўчына не разгубілася, вярнулася ў родную школу, закончыла дзесяць класаў. Думка атрымаць прафесію, пачаць самастойнае жыццё не пакідала, і па накіраванні калгаса “Гігант” яна паступіла на эканамічнае аддзяленне Смальянскага сельскагаспадарчага тэхнікума, пасля заканчэння якога вярнулася ў калгас.
Тут усё сваё жыццё працуе трактарыстам яе бацька, маці да заслужанага адпачынку рабіла загадчыцай фермы. Міма сялібы Шкураценкаў прайсці і не спыніцца немагчыма — вакол яе рукамі гаспадыні створана непаўторная прыгажосць.
Праз два месяцы работы ў калгасе Алена стала галоўным эканамістам. Як прызналася маладая жанчына, за параўнальна невялікі перыяд некалькі разоў ёй прыходзілася пачынаць справу з нуля. З галавой акунулася яна ў свет планаў, лічбаў, разлікаў.
Наступны этап жыцця быў прысвечаны сям’і. Алена выйшла замуж і пераехала ў г. Ліду. Не пакідала мара атрымаць вышэйшую адукацыю, і яна завочна паступіла адразу на трэці курс Беларускай сельскагаспадарчай акадэміі на факультэт “эканоміка і ўпраўленне прадпрыемствам”.
Лёс склаўся так, што праз пяць гадоў Алена з маленькім сынам Мішам вярнулася ў родныя Славені. Зноў стала працаваць галоўным эканамістам цяпер ужо ў “Талачынскай Навінцы”. Ёй прыйшлося нямала папрацаваць, каб успомніць забытае, пазнаёміцца з новымі палажэннямі ў заканадаўстве, Працоўным кодэксе. Кіраўніцтва гаспадаркі выдзеліла ёй асобны добраўпарадкаваны дом.
З мая мінулага года Алена працуе загадчыцай паштовага аддзялення. Рашэнне змяніць месца работы было звязана перш за ўсё з сямейнымі абставінамі.
У асваенні новай прафесіі дапамаглі веданне камп’ютарнай граматы, парады больш вопытных спецыялістаў, кіраўніцтва. Зараз яна адчувае сябе больш упэўнена, навучылася хутка і ўважліва абслугоўваць кліентаў. Як вядома, пошта аказвае вялікую колькасць прывычных паслуг — прыём паштовых адпраўленняў, падпіскі, усіх відаў плацяжоў. Паступова ўводзяцца ў практыку новыя паслугі з выкарыстаннем сучасных інтэрнэт-тэхналогій.
Алена тактоўна, ветліва і ўважліва прымае заказы ў кожнага з мясцовых жыхароў, прапаноўвае падпісацца на газеты і часопісы. Яна паведаміла, што не заўсёды ўдаецца выканаць даведзены план. Напрыклад, у гэтым месяцы выпісалі 35 рэспубліканскіх газет (па плане — 45). З іх найбольшай папулярнасцю карыстаецца “Советская Белоруссия”. Што да раённай газеты “Наша Талачыншчына”, то яе выпісалі 159 экзэмпляраў (па плане — 181).
Акрамя загадчыцы, у паштовым аддзяленні працуюць два паштальёны. Алена Гермалід абслугоўвае насельніцтва вёсак Камяніца, Новая Яблынка, частку вёскі Ламіншчына, Нарцызава. Аксана Васільева разносіць пошту ў астатняй частцы Ламіншчыны, Зарэччы, Славенях, Антанове. Акрамя падпіскі на перыядычныя выданні, яны таксама прымаюць ад вясковых жыхароў розныя плацяжы.
Алена СЕРАДА.
