Паводкі не чакаем, але на ўсялякі выпадак рыхтуемся да яе
На мінулым тыдні адбылося пасяджэнне камісіі па надзвычайных сітуацыях пры аблвыканкаме з удзелам усіх раёнаў у рэжыме відэаканферэнцыі, прысвечанае пытанням падрыхтоўкі да вясенняй паводкі. Удзел у мерапрыемстве прынялі прадстаўнікі разнастайных ведамстваў, задачаю якіх з’яўляецца забеспячэнне жыццядзейнасці і бяспекі насельніцтва (структуры МНС, дарожныя службы, меліявадгас, аблгідрамет і інш.).
У ходзе пасяджэння было адзначана, што рызыка затаплення падчас раставання снегу існуе толькі ў некаторых раёнах, у адзінкавых месцах. Тым не менш заўсёды неабходна быць гатовымі да любых нечаканасцей.
Пасля завяршэння сеансу відэасувязі былі абмеркаваны пытанні, актуальныя для нашага раёна. У прыватнасці, начальнік РАНС Лі А. А. нагадаў прадпрыемству “Талачын-камунальнік” аб неабходнасці трымаць на кантролі сітуацыю на вуліцы Аршанскай, дзе ў крытычны перыяд пад затапленне могуць трапіць тры дамы, закрануў праблему тэхнічнага стану запорных прыстасаванняў на дамбе аднаго з вадаёмаў (сфера адказнасці меліярацыйнага прадпрыемства), звярнуў увагу на іншыя праблемныя моманты, прама ці ўскосна звязаныя з раставаннем снегу.
Таксама ў ходзе нарады ішла гаворка аб недапушчальнасці выхаду на лёд вадаёмаў, у Полацкім раёне ў гэтым месяцы ўжо быў смяротны выпадак.
Сяргей АБРАМОВІЧ.
