Партрэт з Дошкі гонару: Сяргей Навумаў вярнуўся да любімай справы
На прадпрыемства меліярацыйных сістэм Сяргей Навумаў прыйшоў працаваць слесарам адразу пасля заканчэння сярэдняй школы №2 у Талачыне. З дзяцінства захапляўся тэхнікай, потым пайшоў па слядах бацькі, які пачынаў на прадпрыемстве экскаватаршчыкам.
Уладзімір Іванавіч закончыў завочна Гарадоцкі тэхнікум механізацыі сельскай гаспадаркі, быў прызначаны загадчыкам гаража. Працуе тут і зараз.
Пасля службы ў арміі ў 2011 годзе Сяргей вярнуўся на прадпрыемства вадзіцелем. Потым закончыў курсы кранаўшчыкоў пры маторарамонтным заводзе ў Віцебску. Гэтай справай ён зацікавіўся яшчэ падчас службы ў арміі. Але ж перашкодзіла хвароба здаць экзамены і атрымаць пасведчанне.
Першыя чатыры гады працы машыністам аўтакрана навучылі Сяргея быць уважлівым, з адказнасцю адносіцца да даручанай справы, берагчы тэхніку. Шэсць наступных гадоў для яго прайшлі ў пошуках іншай працы. Паспытаўшы нялёгкага хлеба ў Расіі, хлопец вярнуўся дадому і зноў уладкаваўся на Талачынскае ПМС. Тут яго ведалі як добрага спецыяліста, з задавальненнем прынялі на работу.
Сяргей падышоў да свайго старэнькага крана і раптам адчуў, што сапраўды засумаваў па любімай справе. Па парадзе бацькоў Сяргей таксама закончыў завочна Гарадоцкі тэхнікум механізацыі.
Сяргей расказаў, што гэтая работа патрабуе вялі-кай увагі і адказнасці. На сваім аўтакране ён выконвае пад’ём і перавозку розных грузаў. Кран, на якім ён працуе, быў выпушчаны ў 1976 годзе. Сучасная тэхніка, згаджаецца ён, больш універсальная. Аднак Сяргей прывык да свайго “ветэрана”, добра ведае яго магчымасці.
У сям’і Навумавых выхоўваюцца дачка і сын. Два гады таму клопатаў прыкметна пабольшала — пачалі будаўніцтва асабістага дома. Ім быў выдзелены ўчастак, сваімі сіламі залілі фундамент. Маладой сям’і аказана дзяржаўная падтрымка — выдадзены льготны крэдыт для будаўніцтва дома.
Шмат узнікае складаных сітуацый, але Навумавы не страчваюць веры давесці пачатую справу да канца. Пасільную дапамогу аказваюць сябры і родныя. Галоўнае, пачатак ёсць — выкладзены сцены і ўзведзены часовы дах. Вясною работы прадоўжаць. Гэтым клопатам жывуць усе разам у сям’і ўжо зараз.
Алена СЕРАДА.
