Непрыемныя наступствы недарэчнай забавы: коханаўскія падлеткі за здзекі з трупа ката пастаўлены на ўлік у інспекцыю па справах непаўналетніх
Камісіяй па справах непаўналетніх разгледжаны ўчынак трох коханаўскіх падлеткаў, у сувязі з якім адна жыхарка гарпасёлка звярнулася з заяваю ў міліцыю і звесткі аб якім нават трапілі ў інтэрнэт. Праўда, у ходзе пасяджэння было адзначана, што ў інтэрнэце падзеі пададзены ў скажоным выглядзе: на самай справе ката дзеці не забівалі, а знайшлі нежывым і ўстроілі сабе такую забаву — дурэлі з трупам і ў рэшце рэшт павесілі яго.
Перад камісіяй стаялі і не маглі ад спалоху вымавіць ні слова хлопцы з зусім не злымі, мяккімі дзіцячымі тварамі.
— Расказвайце, як усё было.
У адказ — маўчанне. Інспектар па справах непаўналетніх РАУС зачытала атрыманыя раней тлумачэнні: ішлі па мікрараёне, знайшлі ката, пачалі, смеючыся, цягаць, штурхаць яго, пасля павесілі. Пры гэтым хтосьці дзейнічаў больш актыўна, а хтосьці пераважна назіраў.
— Навошта вы гэта зрабілі?
Зноў маўчанне.
— Вы разумееце, што гэта недапушчальны ўчынак?
— Так…
Зразумела, падобныя “забавы”, нават нягледзячы на тое, што трупу не баліць, грамадствам могуць быць ацэнены толькі негатыўна, як амаральныя, і сведчаць або аб прабелах у выхаванні, або аб нейкіх псіхалагічных праблемах дзяцей. Цяпер хлопцы будуць знаходзіцца ў цэнтры асабліва пільнай увагі не толькі педагогаў, а яшчэ і праваахоўных органаў: яны пастаўлены на ўлік у інспекцыю па справах непаўналетніх. А маці ўсіх траіх прыцягнуты да адміністрацыйнай адказнасці па артыкуле 9.4 Кодэкса аб адміністрацыйных правапарушэннях (“Невыкананне абавязкаў па выхаванні дзяцей”).
Уладзімір МІХАЙЛАЎ.
