Славенскія вучні занялі другое месца ў абласным фестывалі “Рэха Чарнобыля”
Кожны год у Віцебску праходзіць абласны фестываль “Рэха Чарнобыля”, прысвечаны трагічным падзеям 26 красавіка 1986 года. Сёлета наш раён на ім прадставіла агітбрыгада вучняў Славенскай сярэдняй школы пад кіраўніцтвам настаўніцы музыкі Наталлі Аляксандраўны Парфянчук з праграмай “Чарнобыль — чорны палын”.
У выступленні прымалі ўдзел вучні з сёмага па адзінаццаты клас. Журы высока ацаніла іх інсцэніроўку, прысудзіўшы другое месца.
Да конкурсу актыўна рыхтаваліся вучні і настаўнікі. Наталля Аляксандраўна займалася распрацоўкай сцэнарыя. У яго канву былі ўмела ўплецены музыка і песні, вершы. Дарэчы, адзін з іх настаўніца напісала сама.
Выступленне харэаграфічнага калектыву раённага Цэнтра дзяцей і моладзі пад кіраўніцтвам Галіны Міхайлаўны Марцынкевіч дапоўніла і зрабіла праграму агітбрыгады яшчэ больш эмацыянальнай. Відэарад слайдаў на чарнобыльскую тэматыку падрыхтавала настаўніца інфарматыкі Вольга Віктараўна Пруткова.
Удзельнікі агітбрыгады расказвалі пра ўздзеянне радыяцыі на чалавека і прыроду. Асабліва кранальна прагучала тэма “Дзеці Чарнобыля”. З любоўю да роднага краю ў выкананні вучняў прагучалі песні “Жураўлі на Палессе ляцяць”, “Каб любіць Беларусь нашу мілую”, “Зямля мая”.
Алена СЕРАДА.
Славенскія вучні занялі другое месца ў абласным фестывалі "Рэха Чарнобыля",
