Гаражны кааператыў у Талачыне не ў крытычным, але і не ў ідэальным стане
Гаражныя кааператывы — патэнцыяльная крыніца забруджвання навакольнага асяроддзя. Канцэнтрацыя ў адным месцы значнага аб’ёму гаруча-змазачных матэрыялаў і іншай хіміі, правядзенне мерапрыемстваў па рамонце і тэхнічным абслугоўванні транспартных сродкаў павышаюць верагоднасць таго, што шкодныя рэчывы ў большай ці меншай колькасці трапяць у глебу. А калі да гэтага дадаць яшчэ і несвядомасць некаторых аўтаўладальнікаў, схільных ствараць сметнікі прама побач з гаражамі ці знарок выліваць на зямлю адпрацаваныя тэхнічныя вадкасці, то сітуацыя можа атрымацца яшчэ больш крытычнаю.
На мінулым тыдні, знаходзячыся праездам каля гаражнага кааператыва на вуліцы Аршанскай у Талачыне, мы пацікавіліся станам навакольнага асяроддзя на прылеглай да яго тэрыторыі. Непрымальных з’яў, якія маглі б абурыць і шакіраваць, убачыць не давялося. Унутры кааператыва ўвогуле амаль узорная чысціня і парадак, а вось вакол яго, уздоўж глухіх сцен, у некаторых месцах кінуліся ў вочы не толькі кучы раслінных адходаў і паваленыя дрэвы, але і смецце, якога без удзелу чалавека тут ніколі не з’явілася б.
Так, з боку вуліцы Мінскай у зарасніках каля сцяны валяліся поліэтыленавыя пакеты і посуд, корпус панэлі прыбораў нейкага аўтамабіля і нават керамічны бачок ад унітаза. Відавочна, што некаторым грамадзянам усё яшчэ ўласцівыя безадказнасць і непавага як да афіцыйных патрабаванняў да ўтрымання тэрыторый, так і да агульнапрынятых маральных нормаў.
Уладзімір МІХАЙЛАЎ.