«Паэтычны ветразь»: вучні раёна прадэманстравалі свае таленты
У Цэнтры дзяцей і моладзі адбыўся традыцыйны раённы конкурс «Паэтычны ветразь», у якім прынялі ўдзел 56 вучняў з 15 устаноў адукацыі. Ён праводзіўся з мэтай папулярызацыі творчасці класікаў сусветнай і беларускай літаратуры і быў прысвечаны святкаванню 85-годдзя з дня нараджэння Уладзіміра Караткевіча, 95-годдзя — Андрэя Макаёнка, Iвана Шамякіна і Івана Мележа, 120-годдзя — Кандрата Крапівы, 140-годдзя — Цеткі (Алаізы Пашкевіч), 80-годдзя — Янкі Сіпакова.
Конкурс праводзіўся па чатырох намінацыях: “Нам засталася спадчына” (дэкламатараў твораў), “І ў сэрцы нарадзіўся спеў…” (выкананне песнi на вершы паэтаў, iнсцэнiраванне твора), “У вянок песнярам” (вiдэафiльм да твораў), “Час чытаць, захапляцца, спрачацца” (сачыненні, эсэ, водгукі, уласныя вершы, прысвечаныя творчасці знакамітых землякоў).
У гэтым годзе сцэнарый конкурсу і вядучых (Ілля Бераснякоў і Марына Астроўская) рыхтавала настаўніца беларускай мовы і літаратуры сярэдняй школы №1 Алена Анатольеўна Лісоўская. Да гэтай справы яна падышла творча. Майстэрства канферансье таксамы было безумоўным.
З кожным годам журы ўсё складаней і складаней вылучаць пераможцаў, бо ўсе дзеці вельмі таленавітыя, сапраўдныя аматары беларускага слова і знаўцы твораў беларускіх пісьменнікаў. Да кожнага нумара рыхтавалі дэкарацыі, касцюмы, відэарад. Вучні дэманстравалі свае таленты ва ўсіх намінацыях — гэта і тэатральнае майстэрства, і рэжысёрскі падыход да складання відэафільмаў, пастаноўкі нумароў, дэкламацыі вершаў пісьменнікаў, напіса ўласных вершаў, водгукаў, прысвечаных творчасці беларускіх пісьменнікаў, вакальныя здольнасці ў выкананні беларускіх песень.
Уразілі выразным чытаннем вершаў, балад, прозы Карына Кандратовіч (СШ №2), Марыус Рогалеў (гімназія), Ксенія Кавалёва і Паліна Васкрасенская (Коханаўская СШ), Дзіяна Кітаёва (Забалацкая СШ).
Як заўсёды пакарылі залу майстэрствам спяваць Алег Валчок (СШ №2) і Алена Мацюшкова (Славенская СШ). Цудоўнай была інсцэніроўка ўрыўка з рамана У. Караткевіча “Паром на рацэ” вучняў сярэдняй школы №2. А як спявалі прыпеўкі ваенных часоў паводле твора К. Крапівы навучэнцы з СШ №1 “Разлюлі-люлі маліна!”.
Змястоўным аказаўся відэафільм Аляксандра Квяткевіча з Коханаўскай сярэдняй школы. Яскравымі, узнёслымі былі ўласныя вершы Аляксандры Ліцвінкі (Забалацкая СШ), “Прысвячэнне юбіляру” Ксеніі Рак, “Абуджэнне сумлення” Анастасіі Дадонавай, “Іван Мележ” Эвеліны Танаян (СШ №1).
З 38 нумароў пераможцамі і намінантамі сталі 20. Удзельнікі былі ўзнагароджаны граматамі за актыўны ўдзел у конкурсе, а пераможцы атрымалі сувеніры ад ГА “Белая Русь”.
Юлія КАПРАНАВА.
«Паэтычны ветразь»: вучні раёна прадэманстравалі свае таленты,