Першапрычына — узровень культуры
Жыхар прыватнага сектара ў горадзе папрасіў дапамогі: “Хачу пакасіць траву ўздоўж сваёй сядзібы, але не магу: тут накідана куча смецця, якую ўбярэш хіба толькі пагрузчыкам. Нават ведаю і паведамляў у экалагічную інспекцыю, чыіх рук гэта справа, але як даказаць? Я пенсіянер, наняць тэхніку не магу. Як пазбавіцца ад гэтай кучы?”
Даць параду ў гэтай сітуацыі мы папрасілі начальніка аддзела ЖКГ райвыканкама Стралкову Л. Л.
— Калі несанкцыянаваны сметнік знаходзіцца на землях агульнага карыстання, то грамадзяніну неабходна падаць заяўку дыспетчару камунгаса, і смецце будзе ўбрана бяс-платна, — паведаміла Ларыса Леанідаўна. — Калі ж яно знаходзіцца на ўчастку грамадзяніна (у двары, на агародзе і г. д.), то вываз магчымы толькі на платнай аснове.
Мы пабывалі на месцы і пераканаліся: куча сапраўды даволі вялікая, да таго ж застарэлая, парослая травою. На паверхні відаць пераважна дошкі, цэгла і рэшткі дрэў, крыху поліэтылену. Што ўнутры — невядома. Мясціна тут зацішная, можна сказаць, глухая, далей — рэчка і поле, таму, відаць, і палічыў хтосьці дапушчальным вынесці сюды адходы сваёй гаспадарчай дзейнасці. Хаця зацішнасць гэтага кутка — прычына другарадная, а ў аснове ўсяго — узровень культуры.
Сяргей АБРАМОВІЧ.
