У талачынскага ансамбля “Друцічы” былі ўсе падставы ехаць у Паставы
У дзевятнаццаты раз у чэрвені прайшоў Міжнародны фестываль народнай музыкі “Звіняць цымбалы і гармонік” на гасціннай пастаўскай зямлі, якую па праву называюць музычным Паазер’ем. Тут сабраліся прыхільнікі народнай музыкі з усіх рэгіёнаў Беларусі і краін замежжа.
Унікальнасць фестывалю ў яго адметнасці і своеасаблівасці. Народная музыка гучала тут у выкананні народных інструментаў — цымбалаў і гармонікаў.
Удзельнікі і госці фестывалю прынялі ўдзел у конкурсных спаборніцтвах, абмеркавалі плыні і напрамкі народнай музычнай культуры. Майстры дэкаратыўна-прыкладнога мастацтва дэманстравалі свае вырабы на майстар-класах.
Сярод запрошаных на музычны форум прысутнічалі і нашы землякі-талачынцы — ансамбль старадаўняй музыкі “Друцічы” Талачынскай дзіцячай школы мастацтваў пад кіраўніцтвам дырэктара ўстановы Веры Міхайлаўны Ворашань. Нагадаем, калектыў быў створаны ў 2012 годзе. У яго рэпертуары асноўнае месца займаюць сярэднявечная музыка, а таксама творы эпохі класіцызму.
Першы твор, які заўсёды выконваюць “Друцічы”, гэта сюіта “Па старонках Полацкага сшытка” ў апрацоўцы А. Кавалёва. Выступленне незвычайнага самабытнага ансамбля заўсёды ўпрыгожвае кожнае мерапрыемства, узгадаем, да прыкладу, абласны фестываль-кірмаш “Дажынкі-2015” у Талачыне.
Выступленне “Друцічаў” на занальным конкурсе самадзейных калектываў вобласці ў Оршы ўразіла журы непаўторнасцю гучання. Тагачасных музычных інструментаў у калектыве няма, гукавы каларыт старадаўняй эпохі ўзнаўляецца сучаснымі цымбаламі, скрыпкай, флейтай, баянам і акардэонам.
На фестывалі ансамблю “Друцічы” выпаў вялікі гонар прымаць удзел у яркім відовішчы тэатралізаванага прадстаўлення ў замку графа Тызенгаўза ў Паставах. Пад іх музыку выконваліся старадаўнія бальныя танцы з удзелам гледачоў.
Акрамя таго, самадзейныя артысты прынялі ўдзел у канцэртах класічнай музыкі. Асабліва ўражлівым і запамінальным было выступленне ансамбля ў касцёле Святога Антонія Падуанскага. Аматары старадаўняй музыкі з зачараваннем слухалі музыку нашых продкаў, якая гулкім рэхам узнімалася пад высокія скляпенні касцёла.
Падчас правядзення фестывалю ўдзельнікі мелі магчымасць наведаць музейную выставу, прысвечаную 230-годдзю з дня нараджэння графа Тызенгаўза і 200-годдзю Пастаўскага арніталагічнага музея, паслухаць выступленні музычных калектываў Польшчы, Расіі, Латвіі, Літвы, Эстоніі. З вялікай цікавасцю яны разглядалі старадаўнія музычныя інструменты, вырабленыя майстрам Андрэем Шклёдам. Некаторыя з іх ён падарыў нашаму ансамблю.
Алена СЕРАДА.
НА ЗДЫМКУ: выступленне ансамля старадаўняй музыкі “Друцічы” у касцёле Святога Антонія Падуанскага.
У талачынскага ансамбля “Друцічы” былі ўсе падставы ехаць у Паставы,
