На Талачынскім кансервавым заводзе раннія гатункі бульбы даюць да 400 цэнтнераў з гектара
— Бульбяны клубень, — падзялілася галоўны аграном кансервавага завода Капранава Т. М., — сфарміраваўся добра, і па паступаючых заяўках спажыўцоў мы ўбіраем раннія гатункі бульбы Брыз і Рэд Скарлет на продаж. Перавага аддаецца Брызу…
Пакуль што ў рабоце задзейнічаны два камбайны, а дзесьці праз тыдзень пачнецца масавая ўборка на бульбяным палетку.
Як і ў мінулым годзе, асноўным заказчыкам на пастаўку талачынскай бульбы з’яўляюцца яе спажыўцы з суседняй Расіі. Прадстаўлена яна і на прылаўках у нашым горадзе.
— Больш за тыдзень ужо, — паведаміла загадчыца магазіна “Світанак” у Талачыне Алена Горлач, — мы прадаём бульбу, вырашчаную на нашым прадпрыемстве. Гэта гатунак Рэд Скарлет. Кілаграм ранняй бульбы каштуе 47 капеек. Попыт на прадукцыю завода добры, і нас гэтае задавальняе.
— Хвалюе, — заўважыла галоўны аграном — сёлетняя звыш усялякіх нормаў пераўвільготненасць глебы. На многіх участках у барознах стаіць вада. Гэта правакуе розныя захворванні клубняў. Уважліва адследжваем яе стан, каб своечасова можна было прыняць меры па захаванні вырашчанага ўраджаю…
Дарэчы, ён і сёлета тут неблагі. Раннія гатункі даюць з гектара да 400 цэнтнераў клубняў. Нагадаем, што бульбяное поле Талачынскага кансервавага завода самае вялікае ў краіне — 900 гектараў.
Віктар БІРУКОЎ.
