Уладзімір Яршоў: праца арганізаваная, зладжаная — і вынікі радуюць
Калі ў раёне яшчэ ніхто не намалаціў тысячы тон, але з дня на дзень можна было чакаць гэтай прыемнай падзеі, мы папрасілі аднаго з тых, хто набліжаўся да знакавага рубяжу, механізатара кансервавага завода Уладзіміра Яршова, падзяліцца сваімі назіраннямі за ходам сёлетняй уборкі і, калі ёсць, сакрэтамі поспеху.
— Сакрэтаў няма, — вытрымаўшы невялікую паўзу, разважыўшы, адказаў наш субяседнік (дарэчы, якраз назаўтра пасля гэтай гутаркі ён стаў тысячнікам). — Тэхніка падрыхтаваная, працэс добра арганізаваны і адладжаны, працуй сабе і ўсё. Камбайну майму пяты сезон, якія-небудзь дробныя паломкі асаблівых цяжкасцей не выклікаюць, ну, а калі што-небудзь сур’ёзнае здарыцца, то, думаю, таксама справімся, усе службы і кіраўніцтва прадпрыемства сітуацыяй валодаюць і працуюць зладжана.
Стан палёў, адзначыў Уладзімір, розны, але найбольш праблемныя ўчасткі, з палегліцай, былі ўбраны раней, і цяпер даводзіцца працаваць ужо ў больш спрыяльных умовах. Працоўны дзень працягваецца ў сярэднім з 7 да 22 гадзін, у залежнасці ад надвор’я і іншых фактараў.
Сяргей АБРАМОВІЧ.
