У падарунак — пазітыўны настрой і “талачынскае райскае яблычка”
У дваццаць першы раз у вёсцы Малыя Алашкі на Шаркоўшчыне прайшоў абласны фестываль “Яблычны фэст”. У гэтай маляўнічай мясціне жыў і працаваў знакаміты беларускі садавод-селекцыянер Іван Паўлавіч Сікора. Сарты выведзеных ім яблыкаў вядомыя нават у Амерыцы.
На свята з’ехаліся самадзейныя артысты з усіх куткоў нашай вобласці, а таксама дэлегацыя з Літвы. У рамках фестывалю прайшоў канцэрт з удзелам вядучых самадзейных калектываў вобласці, адбыліся прэзентацыі аматарскіх аб’яднанняў, клубаў маладых дызайнераў-мадэльераў і іншыя. Удзельнікі і госці фэсту традыцыйна наведалі музей вядомага садавода.
Наш раён на свяце прадставіла аматарскае аб’яднанне “Сям’я” Славенскага сельскага Дома культуры, кіраўніком яго з’яўляецца Святлана Забэла. Калектыў быў арганізаваны дваццаць год таму і аб’ядноўвае творчых, ініцыятыўных людзей, сапраўдных энтузіястаў. З цягам часу дарослыя зацікавілі і прывялі ў самадзейнасць сваіх дзяцей, унукаў, родных. У складзе аматарскага аб’яднання сем’і Кубекаў, Прутковых, Забэла, Шпунікавых, Маргарынтаў і іншыя.
Падвор’е талачынцаў на абласным свяце адрознівалася цікавым падыходам да афармлення. Па ўсім было бачна, рыхтаваліся загадзя, прадумвалі кожную дэталь. Дарэчы, усё было зроблена рукамі ўдзельнікаў аб’яднання. У афармленні падворка выкарыстоўвалася мноства розных дэкарацый. На фоне бярозавага гаю — калодзеж з жураўлём, сюжэт казкі “Рэпка”.
Для ўдзельнікаў і гасцей свята талачынцы прапанавалі розныя гульні і забавы — бяспройгрышную латарэю, “яблычныя шашкі”, “дрэва пажаданняў”. Тут можна было пачаставацца нацыянальнымі стравамі, паспытаць духмяную гарбату з лекавых траў. Самадзейныя артысты ўмела суправаджалі частаванне вясёлымі прыпеўкамі, жартамі, гэта стварала ўзнёслы, святочны настрой.
Да ўвагі гледачоў талачынцы прапанавалі праграму “Яблычны Спас”. У выкананні вакальнага гурта гучалі песні. Артысты прачыталі вершы, напісаныя кіраўніком народнай гасцёўні “Друць” Уладзімірам Аляксандравічам Чаплянком. Прэзентацыя клуба “Сям’я” была высока ацэнена журы.
Свята мае свае “яблычныя” традыцыі. Кожны калектыў вобласці прывёз з сабой сувеніры для музея Івана Сікоры. Талачынцы падарылі прыгожую карціну “Талачынскае райскае яблычка”, арыгінальна вырабленую з саломкі, бісеру і прыроднага матэрыялу. Аўтарам работы з’яўляецца кіраўнік гуртка дэкаратыўна-прыкладноай творчасці Коханаўскага ГПДК Людміла Аляксандраўна Лазарэнка.
Напрыканцы ўсе ўдзельнікі свята былі ўзнагароджаны дыпломамі за актыўны ўдзел. У знак адзінства і дружбы кожнаму калектыву быў уручаны слоік з яблычным варэннем, якое было прыгатавана з яблыкаў, прывезеных на свята з розных куткоў Віцебшчыны.
Алена СЕРАДА.