Вернікі касцёла ў Талачыне прынялі ўдзел у раённым суботніку
Падчас раённага суботніка, у якім прынялі ўдзел арганізацыі раёна, не засталіся ў баку ад важнай справы каталіцкія вернікі касцёла святога Антонія Падуанскага ў г. Талачыне.
На чале з ксяндзом-настаяцелем Віталіем Янкевічам яны заняліся дабраўпарадкоўваннем старой часткі могілак па вуліцы Аршанскай — павысякалі кустоўе, скасілі і згрэблі бур’ян. Дабраўпарадкоўваннем запушчанага старыннага цэнтра могілак трэба займацца на працягу года, яны з’яўляюцца важнай гістарычнай часткай нашага горада. Зроблена і робіцца нямала, але яшчэ больш трэба зрабіць.
Тэма дабраўпарадкоўвання могілак з удзелам насельніцтва неаднаразова ўзнімалася на старонках нашай газеты. Спадзяёмся, што людзі не будуць толькі наракаць на работнікаў жыллёва-камунальнай гаспадаркі, але і самі аднясуцца з павагай да месцаў апошняга прытулку сваіх родных і блізкіх. Пакуль жа цяперашні іх стан сведчыць аб зваротным.
Марыя ХМЯЛЮК.