Новы аб’ект: інтэрнат ДБУ-63 гатовы прыняць навасёлаў (+фота)
Падобныя падзеі мы прывыклі называць доўгачаканымі: у наш няпросты час наваселле праз паўгода пасля пачатку будаўніцтва — гэта штосьці з разраду фантастыкі. Але зусім іншая атрымалася сітуацыя, калі ААТ «Будаўніча-мантажны трэст №8» узялося будаваць 12-кватэрны інтэрнат для работнікаў свайго талачынскага філіяла — ДБУ-63. Работы пачаліся вясною, а 19 кастрычніка адбылося ўрачыстае адкрыццё новага аб’екта.
У прыемнай падзеі прынялі ўдзел старшыня райвыканкама Ягораў С. В., генеральны дырэктар БМТ №8 Алімкін С. А., начальнік ДБУ-63 Яшчук М. Р., дырэктар ПМК-1 (таксама філіял БМТ) Фікаў А. С., галоўны інжынер круглянскай ПМК-266 Хацімка У. М.
Віншуючы прысутных, старшыня райвыканкама падзякаваў кіраўніцтву БМТ №8 і ДБУ-63 за ініцыятыву па паляпшэнні жыллёвых умоў сваіх работнікаў, выказаў словы падзякі будаўнікам, якія ўзводзілі інтэрнат, адзначыў уклад ДБУ-63 у сацыяльна-эканамічнае развіццё раёна.
— Гэта адна з нямногіх арганізацый, якія сёння не скарачаюць, а, наадварот, павялічваюць колькасць сваіх работнікаў. Калі ў мінулым годзе тут працавала каля трохсот чалавек, то цяпер ужо трыста дваццаць. Пра гэтае прадпрыемства даводзіцца чуць толькі станоўчыя водгукі, у тым ліку і з боку нашых суседзяў, якім сёлета ДБУ-63 дапамагала рыхтавацца да абласных «Дажынак», — адзначыў Сяргей Валер’евіч.
Генеральны дырэктар БМТ №8 падзякаваў адміністрацыі раёна за тое, што ўсе службы, ад якіх залежала своечасовае афармленне дакументацыі, спрацавалі аператыўна і такім чынам далі магчымасць без затрымак пачаць будаўніцтва.
— Хачу таксама падзякаваць будаўнікам ПМК-1, якія выканалі асноўны аб’ём будаўніча-мантажных работ, — сказаў Сяргей Аляксеевіч, — нашым калегам з ПМК-266, якія правялі сантэхнічныя работы і сваёй аддзелкаю надалі будынку такі цудоўны выгляд як звонку, так і ўнутры.
І знешняя, і ўнутраная аддзелка сапраўды прыемна ўражваюць і прымушаюць парадавацца за таго, хто будзе тут жыць. «Зроблена, як для сябе», — так звычайна ацэньваюць падобны ўзровень выканання работ. Столь, падлога, сцены — усё роўнае і акуратнае.
Сцены ў ванных пакоях і санвузлах аддзеланыя па-мастацку, пліткаю розных колераў і з рознымі малюнкамі. Свяцільні таксама ў розных пакоях розныя, і не якія-небудзь прымітыўныя, казённыя, а дэкаратыўныя, падабраныя сапраўды для жылога памяшкання.
Удзелена ўвага пытанням энергазберажэння: ацяпляльныя батарэі дапоўнены індывідуальнымі тэрмарэгулятарамі ў кожным пакоі, у ванне і прыбіральні свяцільні з самымі на сённяшні дзень эканамічнымі светладыёднымі лямпачкамі. На падлозе лінолеум, плінтусы — пластыкавыя.
Кухні абсталяваны электраплітамі, выцяжкамі і прыгожаю, не казённага выгляду, мэбляю. Словам, для жыхароў інтэрната створана ўтульная хатняя атмасфера.
Ва ўсіх выступленнях на цырымоніі адкрыцця прагучалі добрыя пажаданні будучым навасёлам, у тым ліку і пажаданне доўга тут не затрымлівацца, а, стварыўшы вялікую і моцную сям’ю, пабудаваць уласнае жыллё.
Сяргей АБРАМОВІЧ.
НА ЗДЫМКУ: стужку пераразаюць Алімкін С. А., Ягораў С. В., Яшчук М. Р.