Подзвіг патрыёта — развітальны салют мужнасці і адвагі: у Славенях ушанавалі памяць Пятра Галецкага
У Славенскай сярэдняй школе прайшлі мерапрыемствы, прысвечаныя памяці Героя Савецкага Саюза Пятра Антонавіча Галецкага, імя якога носіць школа.
Нарадзіўся ён у невялікай вёсцы Майдан, непадалёку ад Славеняў. У час вайны быў байцом партызанскага атрада “Победа”.
20 кастрычніка 1942 года група падрыўнікоў, у якой мінёрам быў Пётр Галецкі, выйшла на перагон Выдрэя — Крынкі для падрыву чыгункі. Калі Пётр з мінай падбег да палатна, з-за павароту раптам паказаўся эшалон з гаручым. Хлопец зразумеў, што часу на закладку міны няма і кінуўся з ёю пад паравоз. Паветра скаланула ад выбуху, полымя і агню. Помнік герою ўстаноўлены ў вёсцы Копці Віцебскага раёна.
Подзвіг Пятра Галецкага быў ацэнены толькі праз дваццаць год. У 1965 годзе пасмяротна ўзнагароджаны ордэнам Леніна, яму было прысвоена званне Героя Савецкага Саюза. У гэтым жа годзе прынята рашэнне прысвоіць імя героя Славенскай сярэдняй школе.
На пачэсным месцы тут знаходзіцца куток, прысвечаны Пятру Галецкаму. Падчас тыдня памяці вучнямі і настаўнікамі аформлены стэнд “Их имена бессмертны”.
Школьнікі маюць магчымасць падрабязна пазнаёміцца з жыццём героя, яго подзвігам, прачытаць верш, напісаны палітруком партызанскага атрада Маркам Максімавым, у якім ён параўноўваў Пятра з легендарным Данка. Яго подзвіг — гэта ззянне сэрца маладога воіна, развітальны салют мужнасці і адвагі патрыёта сваёй Радзімы, смелага партызана.
Да памятнай і трагічнай даты прайшлі класныя гадзіны, гутаркі, аформлена выстава ў бібліятэцы. У шосты школьны дзень прайшла гадзіна памяці “Его имя носит наша школа”. Удзельнікі раённых спартыўных спаборніцтваў “Защитник Отечества” свае дасягненні прысвяцілі памяці Героя Савецкага Саюза Пятра Антонавіча Галецкага.
Алена СЕРАДА.