Талачынскі краязнаўца Анатоль Шнэйдар расказаў школьнікам пра вядомых вучоных, ураджэнцаў раёна
Кожны год, традыцыйна ў лютым, цэнтральная раённая бібліятэка адчыняе свае дзверы для правядзення тыдня інфармацыі “Бібліятэка — тэрыторыя чытання”. Сёлета ён пачаўся з дня інфармацыі “2017 — Год навукі”.
Для вучняў 9 “А” класа сярэдняй школы №1 г. Талачына (класны кіраўнік Ірына Аляксандраўна Свірыдовіч) бібліёграф Ірына Аляксандраўна Труханёнак правяла прэзентацыю “Букросінг: у Год навукі чытаем навукова-папулярныя кнігі”. У чытальнай зале яна пазнаёміла прысутных з аўтарамі твораў, размешчаных на выставе “Чалавек і навука ў новым тысячагоддзі”. Асаблівую ўвагу Ірына Аляксандраўна звярнула на навуковую дзейнасць вучоных-землякоў.
Падчас правядзення дня інфармацыі адбылася сустрэча вучняў з Ганаровым грамадзянінам раёна, вядомым краязнаўцам, пісьменнікам Анатолем Антонавічам Шнэйдарам. Школьнікі з цікавасцю паслухалі некаторыя факты, якія сведчаць аб незвычайных адкрыццях у вобласці навукі іх равеснікаў з розных куткоў планеты.
Вялікую даследчую работу правёў краязнаўца, каб агучыць імёны вядомых вучоных, ураджэнцаў Талачыншчыны. Звесткі пра іх жыццё і творчасць сабраныя ім у кнізе “Земля над Друтью и Оболянкой”. Анатоль Антонавіч расказаў пра дасягненні заслужанага дзеяча навукі, члена-карэспандэнта Нацыянальнай акадэміі навук Беларусі, доктара філалагічных навук, які закончыў Талачынскую СШ №1, Аркадзія Іосіфавіча Жураўскага.
Нарадзіўся ў Коханаве доктар эканамічных навук, аўтар больш за 80 навуковых работ і манаграфій Пётр Аляксандравіч Красоўскі. З вялікай любоўю да роднага краю адносіцца кандыдат філасофскіх навук Рыгор Часлававіч Лянькевіч, які, дарэчы, з’яўляецца галоўным ініцыятарам і арганізатарам адраджэння гістарычнага мінулага летапіснага Друцка. Жыва і яскрава прагучалі расповеды пра тых, з кім асабіста ён быў знаёмы.
Алена СЕРАДА.
Просто молодец , так держать , молодежь необходимо просвещать в научном понимании жизненных процессов вопреки поповско-казачьих черных сотен.