Талачынскі райаграсэрвіс шмат у чым з’яўляецца прыкладам для аналагічных прадпрыемстваў вобласці
Калегія ААТ “Віцебскі аблаграсэрвіс”, прысвечаная вясенне-палявым работам і вынікам працы за мінулы год, прайшла 10 сакавіка на базе ААТ “Талачынскі райаграсэрвіс”. Удзел у яе рабоце прынялі генеральны дырэктар Віцебскага аблаграсэрвіса Заікін В. У., намеснік генеральнага дырэктара Беззубёнак П. П., кіраўнікі і спецыялісты райаграсэрвісаў вобласці.
Перш чым пачаць пасяджэнне, госці пазнаёміліся з вытворчымі аб’ектамі прадпрыемства. Экскурсія была праведзена не проста дзеля цікаўнасці, яна мела вялікае практычнае значэнне, паколькі па некаторых напрамках дзейнасці вопыт Талачынскага райаграсэрвіса варты пераймання. У прыватнасці, Пётр Беззубёнак высока ацаніў той факт, што прадпрыемству ўдалося наладзіць рамонт паліўнай апаратуры, і цяпер да нас прыязджаюць з гэтай мэтаю з іншых раёнаў.
Са станоўчага боку была адзначана арганізацыя сістэмы аховы працы (наяўнасць клеткі для напампоўвання колаў, супрацьадкатных прыстасаванняў, добрае афармленне кабінета аховы працы і інш.). Была звернута ўвага і на пляцоўку для захоўвання тэхнікі: яна абнесена агароджаю, транспартныя сродкі і земляробчыя агрэгаты расстаўлены акуратна і рацыянальна, плошча выкарыстоўваецца максімальна эфектыўна.
Электрычны молат, плавільная печка, станочны цэх, участак рамонту рухавікоў — абсталяванне райаграсэрвіса дазваляе праводзіць розныя віды рамонту, не звяртаючыся ў іншагароднія спецыялізаваныя арганізацыі. І, дарэчы, на гэтым абсталяванні ёсць каму працаваць, сітуацыя з кадрамі стабільная.
Людзей, як паведаміў дырэктар прадпрыемства Віктар Шчуплянкоў, сёння хапае, браць, як гэта бывала калісьці, першага сустрэчнага, радуючыся таму, што хоць нехта прыйшоў на працу, ужо не трэба.
У ходзе пасяджэння прадстаўнікі раёнаў абмяняліся вопытам па разнастайных напрамках дзейнасці (рамонт тэхнікі, пошук запчастак, набыццё ўдабрэнняў, выплата падаткаў і інш.), атрымалі рэкамендацыі па рашэнні тых ці іншых праблемных пытанняў.
Сяргей АБРАМОВІЧ.
Талачынскі райаграсэрвіс шмат у чым з’яўляецца прыкладам для аналагічных прадпрыемстваў вобласці,