Рэгіянальны злёт юных інспектараў дарожнага руху прайшоў у Талачыне
26 красавіка сярэдняя школа №2 стала месцам правядзення рэгіянальнага злёту юных інспектараў дарожнага руху (звычайна іх называюць рускамоўнаю абрэвіятурай ЮИД — юные инспектора движения) Віцебскай вобласці.
Як паведаміў метадыст аддзела адукацыі, спорту і турызму райвыканкама Кулыгін В. І., усяго ў вобласці прайшлі 3 рэгіянальныя злёты, фіналісты якіх будуць удзельнічаць у абласным этапе. У Талачын прыехала 9 атрадаў, сярод іх і пераможца раённага этапа — каманда Коханаўскай сярэдняй школы імя П. І. Кожара.
У пачатку мерапрыемства да ўдзельнікаў звярнуліся з прывітальнымі словамі, падбадзёрваннямі і пажаданнямі поспехаў намеснік старшыні райвыканкама Галубкова І. С. і галоўны суддзя спаборніцтваў — начальнік аддзялення агітацыі і прапаганды ДАІ УУС аблвыканкама Казючыц А. І. Каб падняць усім настрой і стварыць творчую атмасферу, выступілі і юныя артысты, сярод якіх выканаўцы песень, харэаграфічны калектыў “Каханачка” Коханаўскай ДШМ, ансамбль барабаншчыц ЦДіМ.
У праграму злёту, як звычайна, уваходзілі конкурс насценных газет, конкурс агітбрыгад (мастацкая самадзейнасць на тэму бяспекі дарожнага руху), язда на веласіпедзе, праверка ведання правілаў дарожнага руху і аказання першай медыцынскай дапамогі.
Нягледзячы на тое, што каманда, якая прадстаўляла наш раён, у фінал не трапіла, пахваліцца коханаўскім юным інспектарам ёсць чым: Паліна Цярэня заняла першае месца па веданні ПДР, а ў агітацыйна-мастацкім конкурсе каманда апынулася на трэцім месцы (увогуле ж па выніках конкурсу — на пятым). У фінал выйшлі каманды Першамайскага і Кастрычніцкага раёнаў Віцебска і Аршанскага раёна, якія занялі адпаведна першае, другое і трэцяе месцы.
Сяргей АБРАМОВІЧ.
Рэгіянальны злёт юных інспектараў дарожнага руху прайшоў у Талачыне,
Родной спортзал!!!