Лепшым чытальнікам сярод навучэнцаў прафтэхустаноў Віцебскай вобласці прызнаны юнак з Коханава
Праз два гады зноў ва ўстановах прафесійна-тэхнічнай і сярэдне-спецыяльнай адукацыі рэспублікі стартаваў фестываль “АРТ-вакацыі”, які праходзіў пад дэвізам “Моладзь і творчасць — гісторыя будучыні”. У Віцебску адбыўся гала-канцэрт, у якім са сваімі праграмамі прынялі ўдзел навучэнцы прафтэхустаноў вобласці. Сярод іх — і юнакі, і дзяўчаты Коханаўскага дзяржаўнага прафесіянальнага ліцэя сельскагаспадарскай вытворчасці.
Нікога з прысутных не пакінула раўнадушным майстэрская дэкламацыя Максімам Краўцовым верша “Белая Русь”, напісанага дырэктарам Коханаўскай сярэдняй школы Міхаілам Міхайлавічам Татарановічам. У намінацыі “Чытальнік” Максім аказаўся лепшым і заняў першае месца.
Рыхтавацца да конкурсу яму дапамагала намеснік дырэктара па выхаваўчай рабоце Ірына Віктараўна Бусько. Пад кіраўніцтвам педагога-арганізатара Святланы Генадзьеўны Петрашкевіч (на здымку злева) былі падрыхтаваныя тэатральны, танцавальны і вакальны нумары ў выкананні коханаўскіх навучэнцаў.
Лепшыя самадзейныя артысты вобласці прымуць удзел у гала-канцэрце ў Мінску.
Алена СЕРАДА.