ААТ “Жукнева”: правільнае ўтрыманне кароў на пашы — залог павелічэння надояў
Нядаўна мы пабывалі ў сельгаспрадпрыемстве “Жукнева” і пазнаёміліся з умовамі летняга выпасу кароў малочнатаварнай фермы “Жукнева” і аднайменнага малочнатаварнага комплексу.
Гурт з фермы невялікі, усяго 90 галоў. Паша побач з фермай. У 6 гадзін пасля ранішняй дойкі кароў выганяюць у поле і пасвяць да 12 гадзін. Абедзенная дойка зноў на ферме, жывёле выдаецца камбікорм.У кожнай групе пазначаны навацельныя каровы, яны атрымліваюць канцэнтраты пад прадукцыю. Вячэрняя дойка пачынаецца ў 20 гадзін. Сярэднясутачны надой складае амаль 14 кг малака на адну карову. Даглядаюць статак Сяргей Плахоцкі і Мікалай Акіншаў.
Франтальным спосабам пасвіцца гурт малочнатаварнага комплексу “Жукнева”, 200 кароў. Робяць на ім чатыры пастухі. Уладзімір Буханаў і Алег Малашкевіч падзяліліся некаторымі тонкасцямі тэхналогіі выпасу кароў. Калі загон вялікі, то ўсю траву жывёлы не з’ядаюць, палавіну вытоптваюць. Пастухі вырашылі крыху паменшыць загон, каб часцей пераганяць статак. Трава добрая, і каровы з задавальненнем спажываюць сакавіты зялёны корм. Франтальны спосаб пераконвае ў сваіх перавагах перад парцыённа-загонным, і як вынік — павелічэнне надояў да 16 кг малака на карову.
Умовы для пастухоў створаны добрыя, ёсць чым нагрэць ваду для мыцця даільнай апаратуры. Пастухі забяспечаны двухразовым харчаваннем.
Алена СЕРАДА.