Партрэт з Дошкі гонару: важнасць і адказнасць работы электраманцёра цяжка пераацаніць
Апошнія 17 гадоў працоўнай біяграфіі Ігара Каўрыгі звязаны з Талачынскім раёнам электрасетак. Працуе Ігар тут разам з братам, абодва — электраманцёры. Спецыяльнасць атрымаў у вучылішчы ў Барысаве, рабіў у сельскагаспадарчым і будаўнічым прадпрыемствах, служыў у арміі. Мае вопыт працы не толькі электраманцёрам, а яшчэ і зваршчыкам, але, як відаць, пакуль што галоўнаю справаю жыцця з’яўляюцца для яго мантаж і рамонт электраабсталявання.
Мы гутарылі з Ігарам Анатольевічам назаўтра пасля таго, як у некаторых кропках рэспублікі і ў пераносным, і ў літаральным сэнсе наламала дроў стыхія. На шчасце, наш раён гэтым разам праблемы абышлі, нічога экстрэмальнага на паветраных лініях электраперадачы не здарылася. Але так шанцуе не заўсёды і не ўсім, таму работнікі гэтага ведамства гатовыя да нечаканасцей у любы момант, нават у выхадны дзень.
— Верагоднасць аварыйных сітуацый павялічваецца ў перыяд абледзянення, падчас моцнага ветру, — гаворыць Ігар. — У штатным рэжыме займаемся планавымі работамі: замена старых ліній, абслугоўванне абсталявання.
Прапісныя ісціны пра важнасць электрычнасці як састаўной часткі энергасістэмы краіны і пра смяротную небяспеку электратоку пры няправільным абыходжанні з ім вядомыя ўсім з дзіцячых гадоў. Таму на чалавека, які кожны дзень судакранаецца з гэтай магутнаю сілаю і накіроўвае яе ў стваральнае рэчышча, прымушае выконваць самыя разнастайныя задачы жыццезабеспячэння, заўсёды глядзіш з павагаю, як на прадстаўніка асаблівай сферы дзейнасці, зразумелай і падуладнай далёка не кожнаму.
Правесці работы па электрыфікацыі нейкага аб’екта такім чынам, каб усё функцыянавала бесперабойна і бяспечна, або аднавіць пашкоджаныя стыхіяй лініі ў максімальна сціслы тэрмін (і, зноў жа, з гарантыяй надзейнасці і бяспекі) можа толькі высокакваліфікаваны і адказны спецыяліст, да ліку якіх і адносіцца Ігар Каўрыга, занесены па выніках работы за мінулы год на раённую Дошку гонару.
Сяргей АБРАМОВІЧ.