Два механізатары з “Надзёжына” ў лідарах на корманарыхтоўцы ў Талачынскім раёне
У раёне працягваецца нарыхтоўка кармоў. Паказчыкі ў жывёлагадоўлі закладваюцца менавіта сёння. Гэта добра разумеюць і ў сельгаспрадпрыемстве “Надзёжына”, дзе ў лідарах адразу два механізатары.
Аляксандр Шымко на трактары “Беларус-3522″ у агрэгаце з касілкай КПР-9 скасіў больш за 700 гектараў траў.
Як адзначыў кіраўнік гаспадаркі Міхаіл Васільевіч Кірык, механізатару быў выдзелены новы энерганасычаны трактар, які задзейнічаны практычна на ўсіх відах сельгасработ. Дзякуючы ўмелай рабоце механізатара, упэўнены ён, своечасова будуць скошаны ўсе травы і нарыхтаваны якасныя кармы.
Сярод маладых механізатараў раёна адным з лепшых прызнаны 24-гадовы Аляксандр Емяльянаў. На трактары “Беларус-3022″ у агрэгаце з прэс-падборшчыкам ППУ-1250 ён нарыхтаваў больш за 700 тон кармоў. Дарэчы, раней на гэтым трактары працаваў яго бацька Вячаслаў Міхайлавіч Емяльянаў. Як бачым, сын паспяхова працягвае яго справу.
Механізатараў павіншавалі старшыня райкама прафсаюза работнікаў аграпрамысловага комплексу Таццяна Мікалаеўна Пільшчыкава, галоўны спецыяліст аддзела аддзела ідэалагічнай работы, культуры і па справах моладзі райвыканкама Наталля Уладзіміраўна Грышман, за добрыя працоўныя здзяйсненні ўручылі ім Ганаровыя граматы і каштоўныя падарункі.
Алена СЕРАДА.
НА ЗДЫМКУ: уручэнне граматы і падарунка А. Емяльянаву.