У Забалацкай сярэдняй школе прыярытэт аддаецца працоўнаму выхаванню
Прышкольны ўчастак Забалацкай сярэдняй школы — адзін з самых буйных, належачых навучальным установам раёна, займае плошчу ў 1,2 гектара. На працягу пяці год калектыў прымаў удзел у сельскагаспадарчым галандскім праекце па лініі міжнароднага гуманітарнага таварыства “Дапамажы людзям”. Увесь гэты час школа атрымлівала насенне лепшых галандскіх сартоў бульбы, цыбулі-сяўка, буракоў, морквы, капусты.
Галандцы праводзілі з вучнямі і настаўнікамі спецыяльныя семінары па тэхналогіі апрацоўкі гэтых культур. Дзякуючы сумеснай працы настаўнікаў і вучняў, работнікаў школы тут навучыліся іх вырошчваць, атрымліваюць добрую выручку за сваю прадукцыю.
ПРАДОЎЖЫЛІ ПАЧАТУЮ СПРАВУ
Вітамінную прадукцыю ахвотна бяруць іншыя школы, дашкольныя ўстановы раёна, цэнтральная раённая бальніца. Летась пад завяршэнне праекта школа атрымала агульны прыбытак у чатыры тысячы рублёў. Значную яго частку склалі сродкі, выручаныя за гародніну.
Сёлета вырашылі прадоўжыць пачатую справу і пасеялі на прышкольным участку буракі (12,2 соткі), цыбулю (1,2), моркву (9,5), фасолю (39), капусту (6,6), бульбу (43,3). Мінулай восенню школа прымала ўдзел у сельскагаспадарчых кірмашах у Талачыне, Сянно і Віцебску. Выручаныя сродкі пайшлі на прэміраванне вучняў за поспехі ў вучобе, перамогі ў розных конкурсах, дасягненні ў спартыўных спаборніцтвах, умацаванне матэрыяльна-тэхнічнай базы, рамонт кабінетаў, набыццё посуду для школьнай сталовай.
Сёлетняе халоднае лета ўносіць свае карэктывы, але, нягледзячы на гэтае, тут спадзяюцца на добры ўраджай. Цыбуля і морква пойдуць у школьную сталовую, астатняя прадукцыя будзе рэалізаваная. Да наступнай вясны плануецца набыць цяпліцу для вырошчвання на продаж расады капусты, кветак.
ВЫХАВАННЕ ПРАЦАЙ
Каб атрымаць добры ўраджай, трэба і папрацаваць.
“Працоўнаму выхаванню, — падкрэсліла дырэктар школы Рыма Браніславаўна Кітаёва, — адведзена ў школе адно з першых месцаў. Сучасныя дзеці большую частку вольнага часу імкнуцца правесці ў зносінах з камп’ютарам, планшэтам, тэлевізарам. Маларухомасць, вялікія нагрузкі на зрок у будучым могуць прывесці да сур’ёзных праблем са здароўем. Таму пасільная фізічная праца на ўчастку ідзе вучням толькі на карысць. Добра, калі гэта разумеюць бацькі, таксама прывучаюць дзяцей да працы.”
РАМОНТНЫЯ РАБОТЫ Ў РАЗГАРЫ
У прадстаячым навучальным годзе тут будуць навучацца 94 школьнікі. Зараз рамонтная брыгада старша-класнікаў займаецца рамонтам класаў і калідораў школы. Праз супрацоўніцтва з бельгійскім дабрачынным таварыствам “БелБел” у школе праведзены рамонт санвузлоў. Сёлета з дапамогай бельгійцаў пачаты капітальны рамонт спартыўнай залы. Работнікі школы пафарбавалі столь, атынкавалі і пафарбавалі сцены.
У другой палове жніўня чакаецца прыезд прадстаўнікоў таварыства, каб сумесна з настаўнікамі і работнікамі школы замяніць падлогу. За спонсарскія сродкі таварыствам набыты неабходныя матэрыялы.
Да першага верасня работы будуць завершаныя, і ў новы навучальны год вучні прыйдуць у прыгожую, з густам зробленую спартыўную залу.
Алена СЕРАДА.
