Пачатак працоўнай дзейнасці: вучні Талачынскага раёна падчас летніх канікул займаліся рамонтам школ і шылі пасцельную бялізну
Упраўленнем па працы, занятасці і сацыяльнай абароне сёлета было выдзелена 20 тысяч рублёў на набыццё неабходнага матэрыялу для работы вучнёўскіх брыгад школ раёна. Такі від занятасці школьнікаў існуе не першы год і поўнасцю апраўдвае сябе.
У Коханаўскай, Славенскай, Забалацкай сярэдніх школах, талачынскай раённай гімназіі вучні займаліся рамонтам школ. На базе сярэдняй школы №2 дванаццаць дзяўчынак, найбольш актыўных удзельніц аб’яднанняў па інтарэсах раённага Цэнтра дзяцей і моладзі, пад кіраўніцтвам педагога дадатковай адукацыі Марыны Віктараўны Смаляк шылі пасцельную бялізну для Рацаўскага псіханеўралагічнага дома-інтэрната і аддзялення кругласутачнага прабывання Тэрытарыяльнага цэнтра сацыяльнага абслугоўвання.
Усе вучні, якія працавалі ў брыгадах, атрымалі працоўныя кніжкі, дзе па ўсіх правілах зроблены першыя запісы аб пачатку працоўнай дзейнасці. Дарэчы, школьніцы-швачкі ўжо атрымалі зарабатную плату з рахунка Фонда сацыяльнай абароны насельніцтва, яна саставіла 200 рублёў.
Алена СЕРАДА.