Пяцікласнік талачынскай школы перамог у рэспубліканскім інтэлектуальна-творчым праекце
Самым эрудзіраваным сярод самых маладых удзельнікаў сумеснага праекта Белтэлерадыёкампаніі і Міністэрства адукацыі “Я знаю!” аказаўся вучань 5 Б класа Талачынскай СШ №2 Цімафей Спаткай. Паспяхова прайшоўшы раённы і абласны этапы праекта, 21 верасня ён заваяваў перамогу і на рэспубліканскім — стаў першым у сваёй узроставай катэгорыі (спаборнічаць давялося з адзінаццаццю іншымі пяцікласнікамі).
Удзельнікі гэтага інтэлектуальна-творчага спаборніцтва адказвалі на пытанні з розных абласцей ведаў і выконвалі заданні на знаходлівасць, лагічнае мысленне.
— Цімафей вылучаўся сярод сваіх сапернікаў непасрэднасцю, разняволенасцю, крэатыўнасцю, — расказала намеснік дырэктара школы Гвоздзева С. Г., якая суправаджала вучня ў Мінск, на фінальны этап. — Іншыя дзеці былі даволі напружаныя, заціснутыя, а ён нібыта адчуваў сябе як дома і здзіўляў вядучых сваім жывым розумам, знаходлівасцю, нечаканымі высновамі і назіраннямі. Напрыклад, трэба было адгадаць, што ляжыць у скрынцы. “Сто одежек, хрустит на зубах”, — такая была падказка. Цімафей сказаў, што гэта кукуруза, а калі даведаўся, што на самай справе капуста, адразу заявіў: “Я ніколі не падумаў бы, што капуста можа быць такой маленькай. У нас дома на агародзе качаны па дзесяць кілаграмаў, у такую скрынку яны б не памесціліся”. А калі вядучы Георгій Калдун пажартаваў наконт чырванавухай чарапахі, якая жыве дома ў Цімафея, сказаўшы, што ёй, напэўна, ужо 100 гадоў, таму і вушы пачырванелі, бо яе шмат разоў цягалі за іх як імянінніцу, Цімафей запярэчыў: чарапахі гэтага віду ўвогуле жывуць не больш за 30 гадоў!
Цімафей цікаўны і ўсебакова развіты вучань, хоць і не круглы выдатнік (адзнакі па розных прадметах атрымлівае ад 6 да 10 балаў). Сярод любімых урокаў — як гуманітарныя, так і дакладныя дысцыпліны: матэматыка, чалавек і свет, гісторыя, беларуская і руская літаратура, а па асновах бяспекі жыццядзейнасці ён заняў першае месца ў раёне і другое ў вобласці.
Калі назаўтра пасля свайго трыумфу Цімафей па ўласнай ініцыятыве прыйшоў, каб паглядзець на спаборніцтвы ў іншых узроставых катэгорыях, яго ўсе пазнавалі і фатаграфаваліся з ім, як з зоркаю. А ў бліжэйшай будучыні (калі канкрэтна, пакуль што невядома) Цімафея чакае ўдзел у суперфінале праекта. Ён спадзяецца, што туды яму ўдасца паехаць разам з любімай настаўніцай Наталляй Мікалаеўнай Белагуравай, якая была яго класным кіраўніком у пачатковай школе.
Сяргей АБРАМОВІЧ.
Пяцікласнік талачынскай школы перамог у рэспубліканскім інтэлектуальна-творчым праекце,
Молоток! Успехов!!!
МОЛОДЕЦ.ПОЗДРАВЛЯЮ.