Каб у сям’і ўсё было гладка, пячы, гаспадыня, аладкі: талачынцы праводзілі зіму (+фота)
Хаця пасля Масленіцы прайшоў тыдзень, дзень 24 лютага ў Талачыне быў прысвечаны провадам зімы, якая ў апошнія дні спахапілася і паказала свой нораў. Тыя, хто прыйшоў на гулянне, нягледзячы на мароз, не пашкадавалі. Відовішча было захапляльнае.
Установы культуры прывезлі на конкурс масленічныя лялькі, расказвалі пра народныя звычаі і традыцыі святкавання сустрэчы Вясны, спявалі народныя песні, частавалі ўдзельнікаў свята блінамі, аладкамі, іншымі хатнімі прысмакамі. Масленічная лялька з Раіцкага сельскага Дома культуры вадзіла карагод, у які паступова ўліваліся прысутныя з ліку дарослых і дзяцей. Цікавае тэатралізаванае прадстаўленне паказалі коханаўскія артысты.
Кожны калектыў раёна прадставіў цікавую праграму і частаваў удзельнікаў свята. Кулінарнае майстэрства прадэманстравалі гаспадыні з клуба “Сям’я” пры Славенскім сельскім Доме культуры, якія накрылі багаты стол з прысмакамі, упрыгожылі яго “Блінным дрэвам” і пазнаёмілі прысутных з паходжаннем гарбаты, яе гатункамі.
Журы прысудзіла першае месца ў конкурсе масленічных лялек калектыву Раіцкага сельскага Дома культуры, два другіх — Коханаўскаму і Славенскаму, два трэціх месцы — Аболецкаму і Азерацкаму дамам культуры.
Даспадобы многім прыйшліся гарачыя каша і гарбата з лясных траў, якія прыгатавалі работнікі спажывецкага таварыства. Традыцыйна самыя спрытныя мужчыны — Мікалай, Мікіта, Аляксандр, Стас і Арцём — прынялі ўдзел у лазанні на слуп за прызамі. У гэтым годзе спрабавала свае сілы ў мужчынскім конкурсе і дзяўчына Крысціна. Трэба думаць, што і ў будучым дзяўчаты стануць канкурэнтамі для мужчын. Усе ўдзельнікі конкурсу атрымалі прызы.
Дарэчы, дзень 24 лютага здаўна ў народзе лічыўся асаблівым: святкавалі Аўласа — апекуна хатняй жывёлы, ад якой залежылі матэрыяльны стан і дабрабыт у сям’і. Таму ў гэты дзень, як і на Масленіцу, гаспадыні пяклі бліны і аладкі, каб жывёла была гладкай (сытай і прыгожай).
Дзякуючы такім святам мы больш даведваемся пра звычаі нашых продкаў, захоўваем нашу нацыянальную беларускую культуру.
Марыя ХМЯЛЮК.
Каб у сям'і ўсё было гладка, пячы, гаспадыня, аладкі: талачынцы праводзілі зіму (+фота),
Кохановская кукла “масленица” выглядела самой лучшей на данном мероприятии!
Согласна с Вашим высказыванием.А может попробовать сделать чудо для себя самим? Лично я с удовольствием побывала на празднике. Жаль, что площадку не подсыпали песком. Люди танцевали, но многие побоялись это сделать, так как скользко было. А разве не чудо смотреть на смеющихся детишек?!
Бывает сидишь, сложа руки на пузике, и ждёшь чуда. А чуда всё нет и нет. Зато есть пузико.