Канчатковая перамога талачынскага школьніка Цімафея Спаткая
Цімафей Спаткай, пяцікласнік Талачынскай СШ №2, які ў верасні мінулага года перамог у адборачным туры рэспубліканскага этапа сумеснага праекта Белтэлерадыёкампаніі і Міністэрства адукацыі “Я знаю!”, 27 сакавіка здабыў канчатковую перамогу. У суперфінале ён спаборнічаў з адзінаццаццю іншымі пераможцамі рэспубліканскага адборачнага этапа і не пакінуў ім шанцаў.
— Пытанні былі прыкладна такія, як і восенню, з розных абласцей ведаў, — дзеліцца пераможца ўражаннямі. — Толькі цяпер нам выдалі планшэты, на якіх высвечваліся пытанні і варыянты адказу, а мінулым разам мы карысталіся ручкамі з папераю.
Цімафей вельмі любіць чытаць, апошнім часам прачытаў творы Майна Рыда, якія ўзяў у бабулі. Глядзіць па тэлевізары пазнавальныя перадачы пра іншыя краіны, у інтэрнэце — віктарыны. Яшчэ ён аматар гульняў, якія трэніруюць мысленне: шахматы, шашкі, “Манаполія” (настольная гульня).
Перадача з яго трыумфам у эфіры яшчэ не была. Звычайна іх перадаюць па суботах на тэлеканале “Беларусь-1″.
Сяргей АБРАМОВІЧ.
За такими ребятами – будущее страны! Побольше бы их было!