Работа Дома быту ў Коханаве выйшла на якасна новы ўзровень
Швейны цэх коханаўскага Дома быту працуе па ўсіх напрамках, па якіх можа працаваць прадпрыемства падобнага тыпу: вядзецца і рамонт адзення, і пашыў на заказ.
— Пасля пераходу да элеватара ў нас адбыліся не толькі знешнія змены да лепшага (падрамантаваны будынак), але і ўнутраныя, у арганізацыі вытворчага працэсу, — расказалі 11 красавіка работніцы Таццяна Франуза, Наталля Шарай, Ніна Долгава, Галіна Вакар, Таццяна Конышава (на здымку злева направа). — Сталі больш аператыўна паступаць патрэбныя для работы матэрыялы, з’явіліся тры новыя машыны, павялічылася колькасць заказаў.
— Прывозяць усё своечасова і для нашага ўчастка работы, — дадала майстар па рытуальных паслугах і цырульнік Ганна Літвінава. — На цяперашні момант мы здольныя за паўгадзіны падабраць неабходныя матэрыялы і аформіць вянок у адпаведнасці з пажаданнямі кліента наконт формы і колераў вырабу.
Акрамя вышэйпералічаных паслуг (швейныя, рытуальныя, цырульня), у Доме быту, паведамілі нашы субяседніцы, можна адрамантаваць абутак, раз на тыдзень з’яўляецца майстар, каб аддаць выкананыя і прыняць новыя заказы.
Сяргей АБРАМОВІЧ.