У “Каральках” усё гатова да пачатку пашавага перыяду
Калі б на палях была трава, то жывёлу выгналі б хоць сёння, паведаміла ў аўторак галоўны заатэхнік ААТ “Каралькі” Жанна Багданава наконт гатоўнасці да пашавага перыяду.
— Пастухі ўжо ёсць, з ліку нашых пастаянных работнікаў, усё абгаварылі і заключылі з людзьмі дамовы яшчэ месяц таму, — расказала Жанна Фёдараўна. — Гатовыя да эксплуатацыі сем даільных установак, перамытыя ўсе бочкі, восем штук.
— Даільныя ўстаноўкі (на здымку) прайшлі абслугоўванне (замена масла, камплектуючых), падрамантавалі мы іх пры патрэбе, пафарбавалі, праверылі працаздольнасць, — падзяліўся падрабязнасцямі галоўны інжынер прадпрыемства Віктар Палівянок. — Усё ў поўнай гатоўнасці, толькі маторы знялі на захоўванне, пакуль не выганім статак.
Для людзей, якія даглядаюць жывёлу ў полі, будзе арганізаваны падвоз харчавання (абеды і полудні).
Сяргей АБРАМОВІЧ.
