Лагер “Ніва” прыме тры змены
У гэтыя дні завяршаецца падрыхтоўка спартыўна-аздараўленчага лагера “Ніва” на базе аднайменнага фізкультурна-спартыўнага клуба (у Загараддзі) да прыёму дзяцей.
6 чэрвеня сюды павінна заехаць на 18 дзён змена, сфарміраваная раённым аддзелам адукацыі, а да канца лета пабываюць яшчэ дзве спартыўныя: на мінулым тыдні ўжо былі заяўкі з Магілёва і Віцебска, будуць жыць і трэніравацца ў “Ніве” і нашы, мясцовыя спартсмены.
Пра створаныя ў лагеры бытавыя ўмовы расказаў інжынер ФСК “Ніва” Сяргей Салаўёў:
— Ёсць дзевяць летніх домікаў (адзін з іх — для начальніка лагера), гасцініца (адзін паверх адводзіцца для выхавацеляў, адзін — для дзяцей), гульнявы пакой, туалеты, умывальнікі з халоднай і гарачай вадой, лазня з душам, сталовая, медпункт для аказання даўрачэбнай дапамогі, спартыўная пляцоўка, чамаданная, сушылка для адзення.
Тэрыторыя і памяшканні лагера абследаваны кантрольна-нагляднымі службамі, у тым ліку РАНС і РАУС. Узведзена агароджа там, дзе яна адсутнічала (з боку лесу), уваход/выхад будуць дазваляцца толькі праз кантрольна-прапускны пункт.
Сяргей АБРАМОВІЧ.
