Чым старэйшыя дарогі, тым больш клопатаў па іх абслугоўванні
Красавік і пачатак мая былі для прадпрыемства ДЭУ-8 поўнымі клопатаў і інтэнсіўнай працы. Ажыццяўлялася падрыхтоўка падведамасных яму дарог М1/Е30 і Р19 да штогадовага веснавога агляду камісіяй з удзелам ДАІ і экалагічнай інспекцыі. 10-11 мая агляд паспяхова пройдзены. На цяперашні момант сярэдні бал якасці ўтрымання дарог складае 3,9 бала па 5-бальнай шкале, а бал эксплуатацыі — 3,71.
З мэтаю своечасовага выканання работ былі часова прыцягнуты паўтара дзясятка чалавек праз цэнтр занятасці. Ажыццяўлялася фарбаванне стоек дарожных знакаў, бар’ернай агароджы (11 км), агароджаў на мастах і пуцеправодах (2 км), прыведзена ў парадак 29 аўтобусных павільёнаў і 6 зон адпачынку. Ліквідавана ямачнасць на плошчы 4271 кв. м (3900 кв. м — на дарозе М1/Е30, 371 кв. м — на Р19). Пра ступень зношанасці асфальтавага пакрыцця можна меркаваць па тым факце, што для ліквідацыі 3000 кв. м ямачнасці спатрэбілася выкарыстанне гарачага асфальту (гэта больш складаны метад, які прымяняецца пры значным пашкоджанні, калі плошча ямкі большая за 1 кв. м).
— Пяць гадоў таму ямачнасць пасля зімы была толькі 400 квадратных метраў, а сёлета, як бачыце, у дзесяць разоў большая, — гаворыць начальнік прад-прыемства Яшчук С. Р. — Нічога дзіўнага, дарогі старэюць. На М1, напрыклад, капітальны рамонт праводзіўся больш за дзесяць гадоў таму.
Выкананы вялікія аб’ёмы работ па рамонце і прывядзенні ў парадак (чыстка, фарбаванне і г. д.) тэхнікі на вытворчай базе і машынным двары. Праведзена азеляненне тэрыторыі ўздоўж дарогі М1/Е30: пасаджана 4470 саджанцаў елкі і 400 — ліпы і бярозы (сумарна).
У цяперашні час актуальнасць набывае абкошванне дарог. Для гэтых мэт у арсенале прадпрыемства ёсць 6 касілак і 11 ручных мотакос, з іх 3 касілкі і 6 мотакос ужо задзейнічаны ў рабоце. Будзе праводзіцца таксама абнаўленне дарожнай разметкі, запланавана паверхневая апрацоўка (заліўка эмульсіяй і пасыпанне шчэбенем) 2-кіламетровага ўчастка дарогі Р19, рамонт пуцеправода на 510-м кіламетры дарогі М1/Е30, частковая замена сеткі для абароны ад дзікіх жывёл.
Сяргей АБРАМОВІЧ.
НА ЗДЫМКУ: ажыццяўляецца герметызацыя швоў, якія наразаюцца на нядаўна пакладзеным асфальце з мэтаю прадухілення ўзнікнення трэшчын.