Памятаць і шанаваць герояў — наш маральны абавязак
Надвор’е святу не спрыяла, але грамадзяне Рэспублікі Беларусь не маглі не аддаць даніну павагі героям, якія адстаялі незалежнасць краіны і права будучых пакаленняў на жыццё, таму мітынгі на месцах воінскіх пахаванняў, пахаванняў мірных грамадзян і каля помніка «Вызваленне» (Курган Славы) адбыліся ў прызначаны час.
Прадстаўнікі працоўных калектываў, грамадскіх арганізацый, органаў улады і проста жыхары горада і раёна ўсклалі да мемарыялаў вянкі і кветкі, ушанавалі памяць воінаў хвілінаю маўчання.
Галоўны мітынг раёна, каля Кургана Славы, прайшоў у новым фармаце: коратка, без выступленняў афіцыйных асоб, але ад гэтага не менш урачыста, пранікнёна і душэўна. Сцэнарый мерапрыемства вызначаўся больш мастацкім каларытам: двое вядучых чыталі вершы і гаварылі пра значэнне Дня Незалежнасці ў жыцці нашага народа, нагадвалі, якім коштам гэтая незалежнасць здабывалася.
Людзі стаялі пад парасонамі, і кожны адчуваў, кожны разумеў, што гэта шчасце — жыць у незалежнай краіне, адзначаць асабістыя і ўсенародныя святы, сустракаць і ясныя, і дажджлівыя дні і быць упэўненым, што кожны з іх прынясе табе толькі мірную працу і адпачынак.
Уладзімір МІХАЙЛАЎ.