Ад “першага” хлеба не адстаў і “другі”: на Талачынскім кансервавым заводзе стартавала ўборка бульбы
Калі камбайны Талачынскага кансервавага завода дажыналі апошнія гектары пшаніцы, настала пара выводзіць тэхніку і на бульбяныя палі. 14 жніўня кампанія па ўборцы “другога хлеба” паспяхова стартавала, першыя дзясяткі тон паступілі ў сховішча.
— Пакуль што задзейнічаны тры бульбаўборачныя камбайны, — расказала ў гэты дзень галоўны аграном прадпрыемства Капранава Т. М., — а ўсяго іх у нас адзінаццаць, так што калі канчаткова разбяромся са збожжам, то перавядзём механізатараў і вадзіцеляў сюды, і працэс пойдзе масава.
Бульбяныя плошчы сёлета такія самыя, як і ў мінулым годзе, 900 гектараў. Ураджайнасць пакуль што ацэньваецца на ўзроўні 400 цэнтнераў з гектара. На перыяд чэрвеньскай спёкі выпала такая стадыя развіцця расліны, як фарміраванне сталонаў — падземных элементаў куста, кожны з якіх ператвараецца ў бульбіну. У выніку колькасць сталонаў аказалася меншаю, чым магла б быць, а значыць, знізілася і патэнцыяльная ўраджайнасць (асабліва гэта характэрна для ранніх сартоў). З пачаткам дажджоў усталяваліся камфортныя ўмовы як для бульбы, так і для фітафторы — узнікла неабходнасць апрацоўкі палёў хімічнымі сродкамі аховы. Словам, спакою земляробам не было.
— Сёлетні агранамічны год адметны паскоранымі тэмпамі ўсіх этапаў фарміравання культур: яшчэ не завяршылася адна стадыя, як пачыналася наступная, і ў рэшце рэшт расліна не паспявала раскрыць свой патэнцыял, даць тое, на што здольная ў спрыяльных умовах, — падзялілася назіраннямі Таццяна Міхайлаўна.
Асартымент сартоў у гэтым сезоне ранейшы: былі пасаджаны, як і ў папярэднія гады, айчынныя Брыз, Палац, Першацвет і інш., замежныя Гала (менавіта яна пайшла ў засекі першаю), Астэрыкс. Дарэчы, апошні з вышэйпералічаных сартоў прыдатны для замарозкі, і адпаведную прадукцыю (замарожаная бульба фры) кансервавы завод у будучыні прапануе спажыўцам, на цяперашні момант ужо вызначана месца, на якім плануецца пабудаваць цэх замарозкі.
Продаж маладой бульбы ў сёлетнім сезоне не практыкаваўся: спроба была зроблена, але рынак на той час ужо аказаўся насычаны больш ранняй прадукцыяй з паўднёвых рэгіёнаў, таму ўвесь ураджай (цяпер гэта ўжо канчаткова сфарміраваныя, спелыя клубні з цвёрдай лупінай) паступае на доўгатэрміновае захоўванне і будзе рэалізаваны, калі на рынку складзецца спрыяльнае становішча.
Уладзімір МІХАЙЛАЎ.