У славенскай “Казцы” дзецям цікава і ўтульна
У намінацыі “Лепшы сярод устаноў адукацыі” па добраўпарадкаванні прызнаны Славенскі дзіцячы яслі-сад “Казка”. Апошнія сем гадоў яго ўзначальвае Людміла Грэбень.
На сённяшні дзень гэта сучасная ўстанова дашкольнай адукацыі з музычнай і фізкультурнай заламі, кабінетам педагога-псіхолага, пунктам карэкцыйна-педагагічнай дапамогі. На наступны навучальны год сюды залічаны 65 выхаванцаў ад 2 да 7 гадоў. На базе дашкольнай установы працуюць 3 дашкольныя групы і першы клас Славенскай сярэдняй школы.
Асноўныя напрамкі дзейнасці Славенскага яслі-сада — захаванне і ўмацаванне фізічнага і псіхічнага здароўя дзіцяці. Педкалектыў імкнецца забяспечыць прадметна-развіваючае асяроддзе ў групах, умацаваць матэрыяльна-гаспадарчую базу дашкольнай установы.
Кожны ў калектыве ўносіць свой неацэнны ўклад у работу дзіцячага сада. Асобна трэба адзначыць выдатную працу па добраўпарадкаванні тэрыторыі. Немалая заслуга ў гэтым дворніка Людмілы Кісялёвай, якая кожны дзень не толькі пільна сочыць за чысцінёй, але робіць цікавыя кампазіцыі з падручнага матэрыялу. Рабочая па пранні і рамонце спецадзення Вольга Унучкіна і кастэлянка Настасся Кубека таксама праяўляюць творчасць для стварэння прыгажосці і добрага настрою для дзяцей. Яны сваімі рукамі размалявалі сцены гульнявых пляцовак згодна з сюжэтамі любімых народных казак і мультфільмаў.
Калектыў Славенскага дзіцячага яслі-сада невялікі, але яго супрацоўнікам удалося стварыць суполку аднадумцаў, якая вызначаецца стабільнасцю, творчасцю, высокім прафесіяналізмам і адказнасцю.
Алена СЕРАДА.