Вучэнні па ліквідацыі надзвычайных сітуацый у Талачынскім раёне прайшлі паспяхова
З 26 па 28 верасня на тэрыторыі раёна прайшлі комплексныя вучэнні з органамі кіравання і сіламі Талачынскага раённага звяна Віцебскай тэрытарыяльнай падсістэмы Дзяржаўнай сістэмы папярэджання і ліквідацыі надзвычайных сітуацый і грамадзянскай абароны.
У ходзе вучэнняў адпрацаваны дзеянні на выпадак разнастайных надзвычайных здарэнняў, сярод якіх, у прыватнасці, наступныя: парыў цеплатрасы шматкватэрнага жылога дома, узгаранне зернесушыльнай устаноўкі, узнікненне ачагу сібірскай язвы на малочнатаварнай ферме, выбух газу ў жылым доме, узгаранне ўпаковачнага матэрыялу і тары ў падсобным памяшканні гандлёвага цэнтра, выбух на электрападстанцыі і разліў 3 тон трансфарматарнага масла. У працэсе ліквідацыі гэтых умоўных сітуацый спатрэбілася прыняць такія неадкладныя меры, як тушэнне пажару, разбор завалаў, эвакуацыя людзей, аказанне медыцынскай дапамогі і інш.
На ліквідацыю ўмоўных надзвычайных сітуацый аператыўна прыбывалі брыгады РАНС, райгаза, электрасетак, хуткай медыцынскай дапамогі, спецыялісты сувязі, райЦГЭ, ЖКГ, міліцыя. Былі задзейнічаны таксама добраахвотныя пажарныя дружыны прадпрыемстваў, на базе якіх праводзіліся вучэнні. Райспажыўтаварыствам разгортваўся ў зоне ліквідацыі надзвычайнай сітуацыі пункт харчавання, раённай бальніцай адпрацаваны дзеянні на выпадак масавага паступлення пацярпелых.
Паводле ацэнак Віцебскага абласнога ўпраўлення МНС, якія ўтрымліваюцца на яго сайце ў справаздачах аб ходзе вучэнняў, выратавальнікі і прадстаўнікі іншых службаў раёна спраўляліся з умоўнымі надзвычайнымі сітуацыямі паспяхова.
Сяргей АБРАМОВІЧ.