Талачынская бульба карыстаецца попытам у многіх краінах
Без малога 38 тысяч тон бульбы, сабранай сёлета з палёў Талачынскага кансервавага завода, засыпана ў сховішчы прадпрыемства і паступова адгружаецца спажыўцам з розных краін.
— Асноўны пакупнік — Расія, туды адпраўляецца звычайна 90 — 95%, — расказаў начальнік бульбасховішча Дзмітрый Таутаў. — Назіраецца зацішша ў перыяд дзесяцідзённых навагодніх канікулаў, пасля зноў павялічваецца паток фур. Прыязджаюць пакупнікі і з іншых краін, у розныя гады былі малдаване, сербы, грузіны.
Адразу пасля паступлення ў сховішча бульба аўтаматызаваным і ручным спосабам ачышчаецца ад бацвіння, камення, зямлі, некандыцыйнай масы (гнілыя, зялёныя клубні).
— Зямля вывозіцца зноў на палі, каменне выкарыстоўваецца для падсыпкі з’ездаў, — растлумачыў Дзмітрый Леанідавіч. — Непрыдатная для захоўвання, а таксама зусім дробная бульба старых рэпрадукцый, якая нават на насенне не пойдзе, паступае на перапрацоўку ў крухмальны цэх.
У адну камеру захоўвання можна засыпаць каля 1500 — 1600 тон бульбы слоем да 6 з паловай метраў. Па меры паступлення заказаў камеры ўскрываюцца і пачынаецца сартаванне: што на продаж, што на насенне, што на перапрацоўку. Найбольшым попытам карыстаецца сярод аптовых пакупнікоў расфасоўка ў сеткі па 25 кілаграмаў. Ёсць таксама варыянты па 34, 20, 15, 10 кілаграмаў. Для айчынных гандлёвых сетак прапаноўваецца памытая бульба ў невялікіх (для рознічнага гандлю) поліэтыленавых пакетах.
Сяргей АБРАМОВІЧ.
