У Талачыне нехта ўкраў купленыя ўсім раёнам туі
Раніцай 26 сакавіка рабочыя па добраўпарадкаванні заўважылі, што з 18-ці туй, пасаджаных восенню мінулага года ў гарадскім скверы, засталася толькі адна. Акрамя таго, невядомы нягоднік выдраў з коранем і кінуў, не забраўшы, саджанец ружы.
Начальнік аддзела ЖКГ райвыканкама Стралкова Л. Л. паведаміла, што туі былі куплены ў лясгасе на сродкі, сабраныя ў ходзе раённага суботніка, і пасадка іх праведзена таксама на суботніку. Атрымліваецца, што ўвесь раён добраахвотна папрацаваў дзеля таго, каб зрабіць прыемнае нейкаму злодзею — падараваць яму саджанцы ці то для прысядзібнага ўчастка, ці то для дачы, ці то на прапой.
Калі хто-небудзь валодае нейкай інфармацыяй на гэты конт і падзеліцца ёю з міліцыяй ці камунальнай службай, то тым самым зробіць карысную справу ў інтарэсах усіх добрасумленных грамадзян.
Уладзімір МІХАЙЛАЎ.