На палях “Коханава-Агра” — заслужаныя працаўнікі і іх маладая змена
Калі пасяўная кампанія рабіла першыя крокі, сярод прадпрыемстваў, якія стартавалі і ўключыліся ў працэс найбольш паспяхова, упэўнена набіраючы абароты, начальнік аддзела райсельгасхарча па раслінаводстве Красоўская А. Л. назвала ААТ “Коханава-Агра”. І ў наступныя дні хлебаробы гэтай гаспадаркі паказалі, што здольныя вытрымліваць узяты тэмп: па стане на 8 красавіка трое з іх увайшлі ў лік адзінаццаці лідараў раённага спаборніцтва.
— На палявых работах задзейнічаны тры чызельных культыватары і адзін дыскатар, два пасяўных агрэгаты, — расказаў у сераду галоўны інжынер прадпрыемства Цыбульскі В. В. — Працуюць таксама адзін раскідвальнік цвёрдай арганікі і адна счэпка барон, якою, дарэчы, кіруе навучэнец Коханаўскага ліцэя сельгасвытворчасці.
Адзін з лідараў спаборніцтва — механізатар Пётр Васільевіч Красоўскі. Ён займаецца падрыхтоўкай глебы культыватарам КЧ-5,4. Для яго гэта ўжо 39-я пасяўная кампанія, прычым дзве з іх прайшоў яшчэ да арміі, а пасля вяртання на сваю малую радзіму (нарадзіўся ў Заазер’і, цяпер жыве ў Коханаве) працягнуў пачаты ў юнацтве прафесійны шлях.
— Надвор’е дазваляе, стан глебы ў цяперашні момант аптымальны, прыдатны для пасяўных работ, — падзяліўся Пётр Васільевіч назіраннямі, калі мы сустрэліся з ім у той жа дзень у ваколіцах вёскі Шапчына. Разам са сваім маладзейшым калегам Максімам Колесневым яны праходзілі апошнюю палоску поля і збіраліся пераязджаць на іншае. — Пачалі мы 28 сакавіка, прастояў не здаралася, таму што ўсім забяспечаныя і тэхніка пакуль што не падводзіла.
Застаецца толькі пажадаць, каб і далей не падводзілі ні тэхніка, ні надвор’е — і тады людзі сваю справу зробяць належным чынам, гэты адказны этап палявых работ завершаць паспяхова.
Сяргей АБРАМОВІЧ.