Першы поспех талачынскіх “джынсавых дзяцей”
Бываючы на канцэртах у Раённым цэнтры культуры і народнай творчасці, мы заўсёды любуемся выступленнямі нашых юных артыстаў, захапляемся ўбачаным і пачутым на сцэне ў іх выкананні. І толькі сам артыст, яго бацькі і настаўнік ведаюць, якія намаганні трэба прыкласці, каб навучыцца добра спяваць або танцаваць, колькі трэба сіл, каб пераадолець хваляванне на сцэне і годна выступіць.
На базе Цэнтра культуры працуюць два вакальныя і адзін харэаграфічны дзіцячыя калектывы. Іх удзельнікі на кожным канцэрце радуюць гледачоў сваімі яркімі выступленнямі. Хаця дзеці з розных школ горада, але яны пасябравалі і аб’ядналіся ў дружныя калектывы. У іх рэпертуары песні і танцы пра дружбу, бацькоў, чацвераногіх сяброў і іншыя.
Зусім нядаўна, а калі больш канкрэтна, то ў лютым, у Цэнтры культуры і народнай творчасці ўзнік дзіцячы вакальны калектыў з незвычайнай і інтрыгуючай назвай “Талантвіль”. Яго з’яўленне ініцыіравала дырэктар установы культуры Кацярына Хадневіч. Яна прызналася, што даўно марыла вучыць дзяцей таму, што ўмее і любіць рабіць, — спяваць. Увесь працэс фарміравання калектыву, пачынаючы з аб’явы і праслухоўвання дзяцей, Кацярына ўзяла на сябе.
— Калі ваша дзіця ўмее спяваць, то добра было б аддаць яго ў вакальную групу, — звярнулася яна да бацькоў. — Хто ведае, можа іменна ён у недалёкім або далёкім будучым будзе прадстаўляць нашу краіну на сусветнай арэне спевакоў. Пры гэтым трэба памятаць, што для таго, каб навучыцца прыгожа спяваць, трэба, акрамя голасу, развіваць і іншыя навыкі — слых, уменне дыхаць, артыкуляцыю, пачуццё рытму.
Літаральна праз некалькі дзён дзеці пачалі прыходзіць на праслухоўванне. Па ўмовах адборачнага конкурсу вакальную групу ў саставе 11 чалавек склалі хлопчыкі і дзяўчынкі ва ўзросце ад 9 да 12 гадоў.
Крыху больш чым праз месяц кіраўнік вырашыла выпусціць “Талантвіль” на сцэну. З’яўленне дзяўчынак і хлопчыкаў у джынсах і кашулях у рознакаляровую клетку ўскалыхнула ўвесь зал. Хваляваліся ўсе — юныя артысты і іх кіраўнік. Тым больш, што ў вакальнай групе выступалі яе сыны-двайняты. Выступленне прайшло на “ўра”, пра што сведчылі бурныя апладысменты гледачоў.
А праз некаторы час “джынсавыя дзеці”, як жартоўна іх сталі называць, прынялі ўдзел у X рэгіянальным дзіцяча-юнацкім конкурсе эстрадна-цыркавога мастацтва “Паруса надежды-2019″ у г. Оршы. У намінацыі “вакальна-харавое мастацтва” нашы артысты заваявалі дыплом трэцяй ступені. Першая перамога акрыліла юных вакалістаў, з’явіліся стымул да далейшага развіцця, жаданне выступаць і перамагаць у новых конкурсах.
Алена СЕРАДА.
Першы поспех талачынскіх "джынсавых дзяцей",