Як напамін для нашчадкаў: у Талачыне заклалі алею з нагоды святкавання юбілейнай даты вызвалення раёна ад нямецка-фашысцкіх захопнікаў
У Талачыне адбылася закладка памятнай алеі каля вадаёма паблізу касцёла святога Антонія з нагоды святкавання юбілейнай даты вызвалення роднага краю ад нямецка-фашысцкіх захопнікаў. У акцыі прынялі ўдзел работнікі раённага аддзела ўнутраных спраў, раённага аддзела Следчага камітэта, лясгаса, вучні сярэдняй школы №2 горада, прадстаўнікі грамадскасці, ветэраны працы.
Маладыя саджанцы ліпы ўбяруцца ў сілу, стануць упрыгажэннем данай часткі горада, сімвалам захавання памяці аб гераічным мінулым прадстаўнікоў розных нацыянальнасцей, якія аддалі сваё жыццё ў імя свабоднай, незалежнай краіны, мірнай стваральнай працы.
55 дрэў са свайго гадавальніка выдзеліў Талачынскі лясгас, калектыў якога выступіў ініцыятарам закладкі памятнай алеі ў рамках Тыдня лесу. Аб гэтым паведаміў удзельнікам акцыі галоўны ляснічы прадпрыемства Аляксандр Вышадкевіч. Права пасадзіць першае дрэўца было прадстаўлена ганароваму грамадзяніну нашага горада Герою Сацыялістычнай Працы Лідзіі Андрэеўне Навумавай, а таксама старшыні раённага Савета дэпутатаў Георгію Георгіевічу Мурашку і старшыні маладзёжнай палаты Талачынскага раёна Дзянісу Хусаінаву.
На пасаджанай алеі ўстаноўлена памятная шыльда.
Алена СЕРАДА.
