Незабыўныя імгненні свята ў Талачыне (+фота)
3 ліпеня ў гарадскім скверы жыхары горада і раёна, госці Талачыншчыны мелі магчымасць наведаць талачынскі вернісаж — выставу-продаж вырабаў рамеснікаў і мастакоў. Падзяліцца сваім майстэрствам прыехалі рамеснікі з Віцебска і Магілёва, якія прадставілі мяккія цацкі, вырабы з дрэва і саломкі, сувенірныя сурвэткі і скарбонкі, самаробныя карункі, размаляваныя лыжкі, капелюшы і іншыя цікавыя і карысныя рэчы. Аматары вязанага адзення маглі набыць дзіцячыя і дарослыя ажурныя жакеты, шапачкі, летнія капелюшы і інш.
Індывідуальныя прадпрымальнікі з Магілёва прапаноўвалі біжутэрыю, святочна-карнавальную прадукцыю. Асобую цікавасць дзетвары выклікалі розныя цацкі і гульні на любы густ. З задавальненнем удзельнікі святкавання прымалі ўдзел у бяспройгрышных латарэях, якія разыгрываліся амаль у кожнай палатцы.
Ніхто не прайшоў міма арыгінальных пано, распісаных на зрэзе дрэва натуральнымі самацветамі без выкарыстання фарбаў, якія прадставіў рамеснік з Віцебска. Дарэчы, толькі два чалавекі ў Беларусі займаюцца роспісам з натуральнага каменю.
Прыцягвалі да сябе ўвагу і пашытыя ўмелымі рукамі ўдзельнікаў гурткоў “Майстрыха” і “Цуды з фетру” аддзялення дзённага прабывання для грамадзян пажылога ўзросту і аддзялення дзённага прабывання інвалідаў ТЦСАН цацкі з тканіны і фетру, прыгожыя міні-падушкі, кветкі з фоамірану і іншыя.
Цікава і незвычайна прадставіў фотазону “Как хорошо на свете без войны” Талачынскі гісторыка-краязнаўчы музей. Яго работнікі прыдумалі сюжэтны эпізод вяртання воіна-пераможцы з вайны, а дапамаглі ім у гэтым старыя рэчы. Можна было ўявіць, што салдат, прайшоўшы паў-Еўропы, вярнуўся дадому, стомлена прысеў на канапу, зняў шынель і боты, паставіў старэнькі чамадан, завёў патэфон, каб паслухаць любімыя даваенныя мелодыі. На вокнах музея была зроблена фотавыстава ветэранаў-землякоў, удзельнікаў партызанскага руху, мірных дэманстрацый 50 — 70-х гадоў. На фоне ўсіх гэтых рарытэтаў жадаючыя маглі зрабіць фотаздымкі.
Ніводнае свята ў раённым цэнтры не абыходзіцца без выставы-продажу раённага Дома рамёстваў. Выцінанка, вышываныя ручнікі, вырабы з саломкі і лазы, бісерапляценне, кераміка — вось далёка не ўвесь пералік эксклюзіўных рэчаў, зробленых таленавітымі і стараннымі рукамі нашых майстроў. Жадаючыя маглі паўдзельнічаць у майстар-класе, які праводзіў Рыгор Францавіч Станкевіч. Акрамя таго, на выставе былі прадстаўлены карціны мясцовых мастакоў.
Якое ж свята без славутага попкорну ды марожанага!
З густам аформілі сваю палатку пераапранутыя ў салдацкую форму прадаўцы магазіна №5 “Залаты колас”.
Свята праходзіла пад меладычныя гукі музыкальных інструментаў у выкананні педагогаў і вучняў Талачынскай дзіцячай школы мастацтваў, якія прадставілі праграму “Музыка толочинских улиц”.
То ўзнёсла і трагічна, то весела і жартоўна гучалі песні ў выкананні самадзейных артыстаў Раіцкага сельскага Дома культуры і аўтаклуба на тэматычнай пляцоўцы “Партызанскі прывал”. Многія ўдзельнікі свята, апрануўшы шынель і пілотку, рабілі на памяць фотаздымкі на фоне пабудаванага тут жа шалаша.
На кожнай пляцоўцы было цікава і ажыўлена, што паспрыяла стварэнню добрага і святочнага настрою падчас самага значнага свята нашай рэспублікі — Дня Незалежнасці.
Алена СЕРАДА.
Незабыўныя імгненні свята ў Талачыне (+фота),
