Інспектары пазнаёмілі дзяцей са сваёй дзейнасцю па ахове жывёльнага і расліннага свету
Летні аздараўленчы лагер “Ніва” ў Загараддзі наведалі прадстаўнікі Аршанскай міжраённай інспекцыі аховы жывёльнага і расліннага свету.
Намеснік начальніка інспекцыі Пыхар С. С. і старшы дзяржаўны інспектар Лук’янцаў Д. А. растлумачылі хлопчыкам і дзяўчынкам, якія праводзяць тут летнія канікулы, асновы прыродаахоўнага заканадаўства Беларусі, нагадалі пра абавязак кожнага грамадзяніна беражліва ставіцца да жывёльнага і расліннага багацця краіны, расказалі пра адказнасць за прычыненне шкоды прыродзе (незаконнае паляванне, лоўля рыбы і інш.).
Каб зрабіць сустрэчу не сумнай і маралізатарскай, а жывой і займальнай, госці лагера далі дзецям магчымасць азнаёміцца з тэхнічнымі сродкамі, якія інспектары выкарыстоўваюць у службовай дзейнасці. Рацыя, бінокль, маторная лодка, прыбор начнога бачання — гэтыя і іншыя прылады сталі для дзяцей не толькі забаваю, а яшчэ і наглядным доказам таго, што парушальніку, які трапіць у поле зроку інспекцыі, наўрад ці ўдасца схавацца і пазбегнуць адказнасці.
Сяргей АБРАМОВІЧ.
Фотаздымак атрыманы ад інспекцыі.
