Віцебскія студэнты ахвотна і з добрым для сябе вынікам працуюць на Талачынскім кансервавым заводзе
У садзе і бульбасховішчы Талачынскага кансервавага завода як ніколі жывая і вясёлая атмасфера: пануе бадзёры настрой, гучаць музыка і жарты, а вытворчы працэс (збор яблыкаў і сартаванне бульбы) ідзе паскоранымі тэмпамі. Усё гэта дзякуючы таму, што на перыяд уборкі ўраджаю калектыў прадпрыемства папоўніўся дзвюма сотнямі студэнтаў Віцебскага дзяржаўнага ўніверсітэта імя П. М. Машэрава.
БЫТ НАЛАДЖАНЫ ВЫДАТНА
— Размясцілі мы ўсіх часткова ў нашай гасцініцы, часткова ў спарткомплексе “Ніва” ў Загараддзі, — расказала ў панядзелак намеснік дырэктара кансервавага завода Валянціна Іванаўна Арабчык. — Пражыванне бясплатнае. Харчаванне трохразовае ў нашай сталовай, аплачваюць студэнты 50 % яго кошту (вылічваем з заробку). Дастаўка на месца працы і ў сталовую — нашым транспартам.
Пры такіх умовах нядзіўна, што жадаючых паехаць на заробкі ў Талачын заўсёды шмат, некаторыя тут ужо не першы раз.
— Адгукаецца на прапанову звычайна разы ў два больш студэнтаў, чым патрабуецца заводу, — падзяліўся назіраннямі Антон Леанідавіч Шаўлюга, выкладчык педагагічнага факультэта, які сёлета суправаджае адзін са студатрадаў. Сам ён тут таксама ўжо не ўпершыню і таксама займаецца зборам ураджаю.
ПАЎТЫСЯЧЫ РУБЛЁЎ ЗА ДВА ТЫДНІ
Важкім фактарам, які робіць сезонную працу на кансервавым заводзе прывабнаю для многіх дзяўчат і хлопцаў, з’яўляецца дастойны заробак.
— У нас дзейнічаюць дзённыя нормы збору яблыкаў на аднаго чалавека і адпаведныя гэтым нормам расцэнкі, — растлумачыла садавод Святлана Уладзіміраўна Лісоўская. — На ўчастку, на якім мы працуем у цяперашні час, норма складае 500 кілаграмаў. Дзесьці яблыкаў не так шмат — там планка знізіцца, напрыклад, да 300. У мінулым годзе некаторым найбольш старанным працаўнікам удалося атрымаць каля паўтысячы рублёў за два тыдні працы. Нішто не перашкаджае і сёлета дасягнуць падобных рэкордаў.
Сяргей АБРАМОВІЧ.