Высокія паказчыкі ў вытворчасці бульбы — нязменная традыцыя Талачынскага кансервавага завода
З году ў год Талачынскі кансервавы завод пацвярджае на практыцы свой статус лідара ў маштабах рэспублікі па вытворчасці бульбы. На пачатак тыдня тут паспелі выкапаць 581 гектар з 900, занятых сёлета пад гэтую культуру, і камеры бульбасховішча аказаліся ўжо амаль запоўненымі.
Не прападзе і тая частка ўраджаю, якая яшчэ знаходзіцца ў зямлі: штосьці па меры выкопвання часова размесціцца ў калідорах і іншых памяшканнях, штосьці пойдзе на рэалізацыю ці перапрацоўку.
На працягу апошніх тыдняў стаяла спрыяльнае надвор’е, зямля добра прасохла, і тэхніка ўжо не буксавала, як гэта часам здаралася пасля працяглых дажджоў на старце ўборачнай кампаніі.
— У цяперашні час убіраем сарты Гала (сталовы) і Астэрыкс (падыходзіць для вытворчасці крухмалу і замарожанай бульбы фры), — паведаміла ў панядзелак галоўны аграном прадпрыемства Капранава Т. М. — На сённяшні дзень накапана ў цэлым 28491 тона, ураджайнасць пакуль што вар’іруецца дзесьці ад 490 да 500 цэнтнераў з гектара. Клубні пераважна буйныя і маюць добры таварны выгляд.
Па стане на гэты ж дзень сярэдняя ўраджайнасць бульбы па рэспубліцы складала, у адпаведнасці з аператыўнай зводкай Мінсельгасхарча, 331,9 ц/га, убрана па краіне было 31,8%.
Сяргей АБРАМОВІЧ.
