Рукадзельніцы Забалацкай СШ абшыюць і малых, і старых
Адным з напрамкаў дзейнасці ўпраўлення па працы, занятасці і сацыяльнай абароне Талачынскага райвыканкама з’яўляецца арганізацыя часовай занятасці навучэнцаў школ у вольны ад вучобы час.
Фінансуюцца гэтыя мерапрыемствы з прыцягненнем сродкаў Фонду сацыяльнай абароны насельніцтва Рэспублікі Беларусь. Дзецям выдаюцца працоўныя кніжкі, а значыць, з гэтага моманту для юных грама-дзян афіцыйна пачынаецца іх працоўны шлях.
Падчас летніх канікулаў 5 старшакласніц Забалацкай СШ пад кіраўніцтвам настаўніцы Мішкаруднай В. І. займаліся шыццём пасцельнай бялізны для Дзімітраўскага (а/г Заднева) і Райцаўскага дзіцячых садоў. 2 кастрычніка дзяўчаты разам з настаўніцай на школьным аўтобусе даставілі плён працы сваіх рук выхаванцам заднеўскага дзіцячага сада. І не проста даставілі, а перадалі яго ў займальнай форме, правёўшы для дзяцей невялікае мерапрыемства з рухавай гульнёй і адгадваннем загадак.
У той час, калі яны знаёміліся і забаўляліся з маленькімі гаспадарамі садка, у школе іх ужо чакалі рулоны тканіны і новая магчымасць падзарабіць: чарговая партыя бялізны ад забалацкіх рукадзельніц адправіцца ў Рацаўскі псіханеўралагічны дом-інтэрнат, асноўнымі насельнікамі якога з’яўляюцца пажылыя людзі.
Сяргей АБРАМОВІЧ.
