«Коханава-ЖКГ» і АТП № 11 рэгулярна праводзяць дэзінфекцыйныя мерапрыемствы
Рэкамендаваная Міністэрствам аховы здароўя дэзінфекцыя грамадскіх месцаў актыўна праводзіцца на тэрыторыі Талачынскага раёна.
Работнікі ДП «Коханава-ЖКГ» кожны дзень ажыццяўляюць абеззаражванне пунктаў прыпынку грамадскага транспарту і пад’ездаў жылых дамоў (лаўкі, дзверы, парэнчы) у Талачыне, Коханаве і ў сельскіх населеных пунктах, у якіх ёсць падведамасны камунгасу жылы фонд (Нарцызава, Ламіншчына, Усвіж-Бук, Райцы). Пра гэта паведаміў нам у пятніцу галоўны інжынер прадпрыемства Хадневіч І. Г. Мерапрыемствы праводзяцца шляхам апырсквання і працірання дэзінфекцыйным рэчывам. Акрамя таго, пры адсутнасці ападкаў абеззаражвальным растворам паліваюцца дарогі цэнтральных вуліц горада. Дэзінфекцыйнае рэчыва закуплена прадпрыемствам за ўласныя сродкі, і па стане на момант нашай гутаркі аб’ёмаў яго было дастаткова для бесперабойнай работы.
Актыўна займаецца супрацьэпідэмічнымі мерапрыемствамі аўтатранспартнае прадпрыемства. Яго дырэктар Кандратовіч Ю. В. расказаў, што ва ўсіх аўтобусах тры разы на дзень праціраюцца дэзінфекцыйным сродкам поручні (на прыгарадных маршрутах гэта робяць вадзі-целі, на гарадскіх — кандуктары), і адзін раз механік робіць поўную дэзінфекцыю (апрацоўка сядзенняў, падлогі, апырскванне звонку). На аўтастанцыі ажыццяўляецца ўборка з выкарыстаннем антысептыку, а пасажыры маюць магчымасць прадэзінфіцыраваць тут рукі.
Сяргей АБРАМОВІЧ.