Подзвіг народа застанецца ў памяці навечна
У мэтах героіка-патрыятычнага выхавання насельніцтва, увекавечвання памяці абаронцаў Айчыны і ахвяр Вялікай Айчыннай вайны, добраўпарадкавання помнікаў і воінскіх пахаванняў сярод аўтаклубаў вобласці ў красавіку — ліпені праводзіцца патрыятычная акцыя «Дарогамі памяці».
Аб дзейнасці раённага аўтаклуба ў час падрыхтоўкі і правядзення патрыятычнай акцыі па дарозе ў Чашніцкі раён расказала дырэктар Людміла Васільеўна Ждановіч:
— Зберагчы памяць аб подзвігу народа, героях-земляках у гады Вялікай Айчыннай вайны — гэта святы абавязак кожнага сумленнага чалавека. Беларусь падчас фашысцкай акупацыі панесла страшэнныя страты. Нездарма яе называюць рэспублікай-партызанкай.
Аўтаклубы Віцебшчыны пачалі ўжо выязджаць на месцы баявой славы, перадаючы эстафету Памяці ад аднаго раёна другому. Спачатку Дубровенскі — Аршанскаму, Аршанскі — нам. І вось сёння (22 красавіка. — Заўв. рэдакцыі) мы перадаем агонь Памяці, кнігу «Памяць. Талачынскі раён» і карту з указаннем помнікаў загінуўшым абаронцам Чашніцкаму раёну. Завершыцца акцыя 3 ліпеня, у Дзень Незалежнасці Рэспублікі Беларусь, у Віцебску, дзе аўтаклубы прымуць удзел у святочных мерапрыемствах, а сабраныя матэрыялы будуць перададзены ў музей імя М. П. Шмырова.
Падчас правядзення акцыі мы запланавалі правесці мерапрыемствы з удзелам устаноў культуры, адукацыі, мясцовых органаў улады. Цыкл мерапрыемстваў носіць назву «Памяць у камянях», бо прысвечана перш за ўсё помнікам загінуўшым у гады Вялікай Айчыннай вайны.
З вучнямі сярэдняй школы №1 г. Талачына намечана кіналекцыя пра помнік тром невядомым танкістам, якія пахаваны на могілках у Райцах. Некалькі гадоў таму зняты на відэа ўспаміны былой жыхаркі Райцаў Зінаіды Сушковай, якая была сведкай пахавання танкістаў. Прайшло шмат часу, але людзі памятаюць пра герояў і на Радаўніцу штогод прыносяць на магілу кветкі.
У Забалацкай і Славенскай сярэдніх школах плануем правесці анлайн-экскурсіі па воінскіх пахаваннях раёна. Каля вёскі Узноснае Серкавіцкага сельсавета адноўлены партызанскі лагер, дзе вучні Кастрычніцкай сярэдняй школы змогуць пазнаёміцца з партызанскім бытам. Мітынгі памяці загінуўшых воінаў, партызан, мірных жыхароў прадугледжана правесці ў сястры Хатыні вёсцы Рыдамля, у Варанцэвічах, Маціёве, Валосаве і Задневе.
Запланаваныя мерапрыемствы будуць праходзіць да 1 ліпеня. Праўда, у праграму могуць быць унесены карэктывы ў залежнасці ад эпідэміялагічнай сітуацыі. Але будзем спадзявацца на лепшае.
І вось наступіла хвалюючая мінута перадачы эстафеты на мяжы з Чашніцкім раёнам. Удзельнікі сустрэчы ўзгадалі мерапрыемствы, прысвечаныя летась 75-годдзю вызвалення Беларусі ад нямецка-фашысцкіх захопнікаў, падзяліліся планамі і задумкамі па святкаванні юбілея Вялікай Перамогі.
Марыя ХМЯЛЮК.
